ବ୍ୟତିକ୍ରମ

 ସକଳ ଜ୍ଞାନର ଅଧିକାରୀ ବୋଲି

ଜୀବ ମଧ୍ୟେ ନର ଶ୍ରେଷ୍ଠ

ସକଳ ଜୀବଙ୍କ ସୁରକ୍ଷା କରିବା 

ମାନବ ହାତରେ ନ୍ୟସ୍ତ

ପଶୁ ପକ୍ଷୀ କୀଟ ପତଙ୍ଗ ସହିତେ

ସରିସ୍ରୁପ ନାନା ଜାତି

ଯେଝା ଜାତି ମଧ୍ୟେ ନାହିଁ ଅହଂଭାବ

ଅଛି ଅଭେଦ ପିରତି

ମଣିଷ ବାପୁଡ଼ା ସ୍ୱାର୍ଥେ ଅନ୍ଧ ହୋଇ

ଜୀବେ କରେ ଅତ୍ୟାଚାର

ପଶୁ ପକ୍ଷୀଙ୍କର ଶାନ୍ତି ସହ ଲୁଟେ

ବଞ୍ଚିବାର ଅଧିକାର

ଧନ ପଣ ଭୋଗ ବିଲାସ ବ୍ଯସନ

ପ୍ରଭାବ ବିସ୍ତାର ପାଇଁ

ହିଂସା ଅହଂକାର ମିଥ୍ୟାର ଆଶ୍ରୟ

ନିଏ ସ୍ୱାର୍ଥେ ଅନ୍ଧ ହୋଇ

ଭୁଲିଯାଏ ନର ପର କି ଆପଣା

ହରାଏ ମାନବିକତା

ନିଜର ପ୍ରତିଷ୍ଠା ବିସ୍ତାର ପାଇଁ କି

କରିଦିଏ ନର ହତ୍ୟା

ସକଳ ମଣିଷ ଏକ ଜାତି ହେଲେ

ଜାତି କରି ବିଭାଜନ 

କିଏ ଉଚ୍ଚ ଜାତି ବୋଲାଏ ଏଇଠି

ଆଉ କେ ଅସ୍ପୃଶ୍ୟ ହୀନ

ପଶୁ ପକ୍ଷୀ ହୋଇ ସମ ଜାତି ପ୍ରୀତି

ରଖିଥିବା ବେଲେ ଜାଣ

ସକଲ ଜ୍ଞାନର ଅଧିକାରୀ ନର

କରେ ତାର ବ୍ୟତିକ୍ରମ