ଫଗୁଣର୍ ରଙ୍ଗ୍
ଫଗୁଣର୍ ରଙ୍ଗ୍
ଆଏଲା ଫଗୁନ୍ ହିଟା ଦୁଗୁନ୍
ପଲେଇ ଗଲାନ ମାଘ୍
ଶୀତ୍, ଖରା କି ବର୍ଷା ନିନ
ଦେହେ ମନ୍ ସୁହା ପାଗ୍ l
ଆମ୍ ,ଚାର୍, ମହୁଲ୍, ଫଲ୍'ସା ,ଗଛେ
ଆସିଗଲାନ କୁଁଚି
କୁଇଲି ରାନୀ ଗହକି ମନେ
କୁହୁକୁହୁ ଦିଏ ଡାକି l
ଧର୍'ତୀ ରାନୀ ଶାଗୁଆ ଶାଢୀ
ପିନ୍ଧି ଦଶୁଛେ ସୁନ୍ଦ୍'ରୀ
ଯେନ୍ ଆଡେ ଗଲେଁ ଆମ୍ ବଉଲର୍
ବାସ୍ ଉଠୁଛେ କହଁରି l
ଯେନ୍'କେ ଯିବୁ ସେନ ଦେଖ୍'ବୁ
ବିହା ବର୍'ପନର୍ ସଉକି
ରସିଆ ରସିଏନ୍'କର୍ ମନ୍ ଦିଆନିଆ
ଭାବ୍ ସର୍'ସର୍ ଗହକି l
ଶିବ ରାତିରି ଜାଗର୍ ମେଲା
ଭକ୍ତିରେ ବନ୍ଧା ଭକତ୍
ଧନ୍ ଜନ୍ ସୁଖ୍ ପାଏମୁଁ ବଲି
କରୁଛନ୍ ଉଷା ବରତ୍ l
ହୁଇଲ୍ ପୁଡାବାକେ ଗାଁ ସହରେଁ
ସିଆନ୍ ସୁଜନ୍ ଜୁଟ୍'ଲେନ
ଦୋଲ୍'ପୂନିଥିଁ ଫଗୁ ଖେଲ୍ ଲାଗି
ସଜ୍'ବାଜ୍ ଆଝୁଁ ଚାଲ୍'ଲାନ l
ଯାତ୍'ରା ପାର୍ଟିର୍ ପୁଷ୍'ପୁନି ପାଲି
ଟିକେ ନିନ ଫୁର୍'ସତ୍
ଗରେଲର୍ ଆମ୍ ସାଆଁଟିଲା ବାଗିର
କେତେ ହଉଛନ୍ ଉସତ୍ ll