ଭାଗବତକାର ଜଗନ୍ନାଥ ଦାସ

ଧନ୍ୟ ଧନ୍ୟ ତୁମେ ଉତ୍କଳର ବ୍ୟାସ l

     ଆହେ ଅତିବଡ଼ି ଜଗନ୍ନାଥ ଦାସ ll

ପ୍ରାକୃତ ପ୍ରବନ୍ଧେ ଲେଖି ଭାଗବତ l

    ଓଡ଼ିଆ ଜାତିକୁ କଲ କୃତ୍ୟ କୃତ୍ୟ ll

ଅମୀୟ ରସାଳ ଗୀତ ନବାକ୍ଷରୀ l

    ଛନ୍ଦେ ଛନ୍ଦେ କୃଷ୍ଣ ରସ ଅଛି ପୁରି ll

ସରଳ ତରଳ ଶିଶୁ ବୋଧ୍ୟ ଯଥା l

    ବୋଧଗମ୍ୟ ଗୂଢ଼ ତତ୍ତ୍ୱ ହରି କଥା ll

ଗ୍ରାମେ ଗ୍ରାମେ ଭାଗବତଟୁଙ୍ଗି ମାନ l

   ପଲ୍ଲୀ ବାସୀଙ୍କର ଚିତ୍ତ ବିନୋଦନ ll

ବୃଦ୍ଧ ବାଳ ବସି ସର୍ବେ ଏକ ମେଳେ l

   ତତ୍ତ୍ଵର ବିଚାର ପ୍ରତି ସଞ୍ଜ ବେଳେ ll

ଲୋଡ଼ା ନାହିଁ କିଛି ଶାସ୍ତ୍ରର ପାଣ୍ଡିତ୍ୟ l

Advertisement

>

     ଅତୀବ ସରଳ ମଧୁମୟ ଗୀତ ll

ତବ ଗୀତେ ହୁଏ ନାସ୍ତିକ ଆସ୍ତିକ l

    ଭାବେ ଭାଗବତ ମୁକ୍ତି ପ୍ରଦାୟକ ll

କର୍ଣ୍ଣରେ ଶ୍ରବଣ ପୁଣି ମୃତ୍ୟୁ କାଳେ l

  ଅପାଠୁଆ ସବୁ ପାଠୁଆ ହୋଇଲେ ll

ଓଡ଼ିଆ ଜାତିର ଜୀବନ ସମ୍ପଦ l

   ଜୀବନସଂହିତା ଜୀବନର ବେଦ ll

ଭାଦ୍ରବ ପୂର୍ଣ୍ଣିମା ଆଜି ଉତ୍କଳରେ l

   ତବ ଗ୍ରନ୍ଥ ପୂଜା ପ୍ରତି ଘରେ ଘରେ ll

ଗ୍ରାମେ ଗ୍ରାମେ ଆଜି ହୁଅଇ ଝଙ୍କୃତ l

    ଭାଗବତ କହେ ବିପ୍ର ଜଗନ୍ନାଥ ll

ତୁମ୍ଭେ ଏ ଜାତିର ସ୍ମରଣୀୟ ଚିର l

   ତୁମ୍ଭ ପଦେ କରେ ଶତ ନମସ୍କାର ll