ଭାବର ଠାକୁର

ଭାବର ଠାକୁର   ମୋ ଜୀବଜୀବନ

    ନୟନ ପିତୁଳା ଜ୍ୟୋତି

ତୁମ ବିନା କେହି    ନୁହଁ ଆପଣାର

     ଦିଅ ପ୍ରଭୁ ସଦଗତି

     ହେ ନାଥ ମଙ୍ଗଳମୟ

ତୁମ ନାମ ଗୁଣି    ଶୁଭେ କଟୁ ଦିନ

     ପଦ୍ମପାଦେ ଥାଉ ଲୟ ।

ଦୂର ହେଉ ମନୁ   କାମ କ୍ରୋଧ ଲୋଭ

     ଭୟ ଅହ° ଭାବ ମୋହ

ପ୍ରକାଶ କିରଣ    କୋଟି ସୂର୍ଯ୍ୟପ୍ରଭ

      ଅରୁଣ ହୁଅ ଉଦୟ

     ନାଶ ତମ ଅନ୍ଧକାର

ବିକଶ ହୃଦୟେ    ବିବେକ ସୁମନ

     ସତ୍ୟ ଶାନ୍ତି ଶତଦଳ ।

ଜାଗି ଉଠୁ ମନେ   ଆଧ୍ୟାତ୍ମିକ ଶକ୍ତି

     ଦିବ୍ୟ ଦୃଷ୍ଟି ଭାବ ଭକ୍ତି

ଉଦ୍ଭବୁ ପ୍ରକୃତି     ସବୁଜ ସୁନ୍ଦର

    ନ ଗ୍ରାସୁ ଲୋଭ ଆସକ୍ତି

     ସୁଖଦୁଃଖ ଭଲମନ୍ଦ

ମଣେ ମୁଁ ସମାନ   ସମଭାବାପନ୍ନେ

    ଆହରେ ଭବ୍ୟ ସୁଗୁଣ ।

ତୁମେ ନିରାକାର   ଅନନ୍ତ ଅଚ୍ୟୁତ

     ବିଶ୍ୱରୂପ ଜଗନ୍ନାଥ

ତୁମେ ସମ୍ଭାବନା   ସୁନ୍ଦର ଭବିଷ୍ୟ

     ବର୍ତ୍ତମାନ କାଳାତୀତ

      ଦିଅ ଅଭୟ ଆଶ୍ରୟ

ହେ ସାରଥି ତୁମେ   ବାହି ନିଅ ରଥ

     ଜୀବନ ହେଉ ତନ୍ମୟ ।।