ବେଙ୍ଗବେଙ୍ଗୁଲୀ

ହାକୁମ ଧାବଲ ମେଘର ସବାରୀ

ଘୋଓ ଘୋଓ ବର୍ଷାପାଣି

ବାଜୁଛି ବାଜଣା ତେଲିଙ୍ଗି ବାଇଦ

ନାଗରା ଯୋଡିମହୁରୀ ।

ବେଙ୍ଗୁଲିନାନୀର ଆଜି ବାହାଘର

ବେଙ୍ଗ ରଜାପୁଅ ବର

ବିଜୁଳି ଚମକ ଝଲସାଏ ଆଖି

ଥାଟବାଟ ପଟୁଆର ।

ରିମିଝିମି ସୁରେ ନାଚୁଛି ବରଷା

ରଙ୍ଗ ଭରେ ଇନ୍ଦ୍ରଧନୁ

ଶଙ୍ଖ ହୁଳହୁଳି ପଡୁଛି ଉଛୁଳି

ଛତ୍ର ଟେକିଅଛି ସାରୁ ।

ମଙ୍ଗଳ ଗୀତିକା ଗାଉଛନ୍ତି ସର୍ବେ

ବେଙ୍ଗୁଲି ମାତା ଭଗିନୀ

ହୁଏ ଛନ୍ନ ଛନ୍ନ ଫସଲ ପ୍ରସନ୍ନ

ସୁରକ୍ଷିତ ହେବ ଜାଣି ।

ହସିବ ତା ଲାଗି ପକ୍ୱ ସୁନା ଧାନ୍ୟ

ଜୀବନ ଅମୃତ କଣ

ହେଉ ପଛେ କ୍ଷୁଦ୍ର ମଙ୍ଗଳ କାରଣେ

ଉଭୟଚର ତା ପ୍ରାଣ ।