ବାପାଙ୍କ ହୃଦୟ

ବାପା ବୋଲି ଯେଉଁ ଦୁଇଟି ଅକ୍ଷର

ଆକାଶରୁ ଉଚ୍ଚତର

ବାପାଙ୍କ ହୃଦୟ ଦିଏ ପରିଚୟ

ସାଗର ଠାରୁ ଗଭୀର ।

ନାରିକେଳ ସମ ବାହାର କଠିନ

ଅନ୍ତର ସଦା କୋମଳ

ହିମାଳୟ ସମ ଧୈର୍ଯ୍ୟ ତା ମହାନ

ସହଇ ଦୁଃଖ ଜଞ୍ଜାଳ ।

ବାପାଙ୍କ ହୃଦୟ ଦିଏ ପରିଚୟ

ଜୀବନର ଅଭିବ୍ୟକ୍ତି

ନିଃସ୍ଵାର୍ଥପ୍ରାଣର ପରମ ଦେବତା

ନଥାଏ ତିଳେ ଆସକ୍ତି ।

ପିତାଙ୍କ ଅନ୍ତର ଅମୃତର ଝର

ମେଣ୍ଟାଇ ଦିଅଇ ଶୋଷ

ପ୍ରେମ କରୁଣାର ନାହିଁ ପଟାନ୍ତର

ନଥାଏ କଦାପି ରୋଷ ।

ଜୀବନ ରଥର ଦାୟିତ୍ୱ ବୋଧର

ଅଟଇ ସେହୁ ସାରଥୀ

.ସମାନଭାବର ଦିଏ ଅଧିକାର

ସେହୁ ଏକା ମହାରଥୀ ।

କଳ୍ପତରୁ ସମ ତାର ଅବଦାନ

ଅଟଇ ଅତୁଳନୀୟ

ବିପଦ ଆପଦେ ଅଥବା ସମ୍ପଦେ

ତ୍ୟାଗ ତାର ମହନୀୟ. ।

ହୃଦୁ ପଡେ ଝରି ମମତା ତାହାରି

ସନ୍ତାନର ହିତ ଚିନ୍ତା

ତାର ଆଶୀର୍ବାଦେ ହୁଏ ନିର୍ବିବାଦେ

ସକଳ ଜଗତ ଜିତା ।

ତା ହୃଦ ଗାରିମା ଅଶେଷ ମହିମା

ହେବ ନାହିଁ ତୁଳନୀୟ

ପିତା ଥିଲା ଜନ ଜୀବନରେ ଧନ୍ୟ

ବିଶାଳ ବାପା ହୃଦୟ. ।