ବାନ୍ଧି ହୁଏନା ଦିବସ ସମାହାରେ
ବାନ୍ଧି ହୁଏନା ଦିବସ ସମାହାରେ
ପାଳୁଛେ ଆମେ ସମାଜରେ
ରୋଜ ଡେ, ପ୍ରପୋଜ ଡେ,
ଚୋକଲେଟ ଡେ, ଟେଡି ଡେ,
ପାଳୁଛେ ମଧ୍ୟ ପ୍ରୋମିଶ ଡେ,
ହଗ ଡେ, କିସ ଡେ, ଭାଲେଣ୍ଟାଇନ ଡେ
କେତେ ଦିବସର ସମାହାର l
କିଛି ଆମେ ମଧ୍ୟ କହୁଛେ
ଶାଶ୍ୱତ ପ୍ରେମଟା ମଜା ବନି ଯାଉଛି
ଏହା ସବୁ ପାଳନରେ
ବ୍ୟବସାୟୀ ମାନେ ଲାଭବାନ ହେଉଛନ୍ତି
ଏହି ସୂଯୋଗରେ l
କିଛି ଆମେ କହୁଛେ
ପ୍ରେମିକ ପ୍ରେମିକା ଙ୍କ ସମୟ କଟି ଯାଉଛି
ସମୟ ମହା ଆନନ୍ଦରେ
ପ୍ରେମ ଶବ୍ଦଟା ଶସ୍ତା ହୋଇଛି ଆମର
ଏହି ପାଶ୍ଚାତ୍ୟ ଅନୁକରଣରେ l
କିଛି ଆମେ କହୁଛେ
ପ୍ରେମ ଦିବସ ପ୍ରଥା ପାଶ୍ଚାତ୍ୟ ଦେଶର
ପାଳିବା ଆସ "ଗୋଲାପ ଦିବସ" ଯାହା ଆମର
ଚକୋଲେଟ୍ ଦିବସ ଆମ
ଦେଶ ପାଇଁ ନାହିଁ ପ୍ରୟୋଜନ
ପିତା ମାତା ବିବାହ ପ୍ରସ୍ତାବ ନେଇ ଆସନ୍ତୁ
"ପ୍ରସ୍ତାବ ଦିନ" l
ମଜ୍ଜିଲେ ମିଠା ପ୍ରୀତି ରସେ ଲାଗେ
ପ୍ରେମ ସମ୍ମୋହନ
ଚକୋଲେଟ୍ ଦିବସ ଆମ ଜାତି ପାଇଁ
ନାହିଁ ପ୍ରୟୋଜନ l
"ପ୍ରତିଜ୍ଞା ଦିବସେ" ପ୍ରତିଜ୍ଞା କରିବା
ଛଡ଼ା ଛଡ଼ି ହେବା ନାହିଁ
"ଆଲିଙ୍ଗନ ଦିନେ" ବାହୁ ବନ୍ଧନେ ଦୁଇ
ହୃଦୟ ମଳିନ ହେବ ନାହିଁ l
"ଚୁମ୍ବନ ଦିବସେ" ପ୍ରାଣ ସଖା ସଖୀର
ମଥାରେ ଚୁମା ଦେଲେ
"ପ୍ରେମ ଦିବସ" ରେ ଦିବ୍ୟ ଉପହାରେ
ପ୍ରୀତି ମାଧୁରିମା ଭରେ l
ଆବାହନ କାଳରୁ ପ୍ରେମ ସମ୍ପର୍କ ରହିଛି
ଜନମ ଠାରୁ ମରଣ
ଚାତକ ଖୋଜଇ ବରଷା ଧାରାକୁ ମେଘ
ଖୋଜଇ ତ ଶ୍ରାବଣ l
ଜନନୀ ଜନ୍ମଭୂମି ସ୍ୱର୍ଗାଦପି ଗରୀୟସୀ,
ସେ ପ୍ରେମ ଫଲଗୁ ଧାରା ନିର୍ଝର
ଭରି ଦିଏ ହୃଦୟ ମନରେ ମମତା ମହକ
ଯାହା ଅଲିଭା ପୃଷ୍ଠା ହୃଦୟର l
ପ୍ରେମ ଶାଶ୍ବତ ପ୍ରେମ ଚିରନ୍ତନ ପ୍ରେମ
ନିଷ୍କଳଙ୍କ ପ୍ରେମ ପବିତ୍ର ଅଟଇ
ପ୍ରତିଜ୍ଞା ଦିବସେ ପ୍ରତିଜ୍ଞା କରିଲେ ସତେ
କିଏ ପ୍ରୀତି ସବୁ ପରଷି ଥାଇ l
ପ୍ରେମ ଏମିତି ପବିତ୍ର, ନାହିଁ ସୀମା
ସରହଦ ସେଥିରେ
ମନର ମଣିଷ ଖୋଜେ ମଣିଷକୁ ଥିଲେ
ଦୁଇଜଣ ଯେତେ ଦୁରେ l
ବିପଦରେ ସାହା ହେବା ପାଇଁ
କଥା ଦେଇ ଥାଏ ଯିଏ
ଏହା ଠାରୁ ଆଉ ବଡ଼ ପ୍ରତିଜ୍ଞା
ସଂସାରରେ ହବ କିଏ l
ଇଚ୍ଛା ହୁଏ କୂଳ ଲଙ୍ଘି ବାହୁ ବନ୍ଧନରେ
ବାନ୍ଧିବାକୁ ମନର ମାନସୀକୁ
ନାହିଁ ତୁଳନା କି ଉପମା, ବାନ୍ଧି ହୁଏନା
ଦିବସର ସମାହାରେ ଅନ୍ତର ଆତ୍ମାକୁ l