ବାଳୁତ ବୀର

ବୀରଭୋଗ୍ୟା ମୋର ବସୁନ୍ଧରା କୋଳେ

କେତେ ଯେ ବୀରପୁତ୍ର ଜନମି ଥିଲେ

ଦେଇଦେଲେ ନିଜ ପ୍ରାଣ ବଳିଦାନ

କରିବାକୁ ଏହି ଦେଶକୁ ସ୍ବାଧିନ

ବାର ବରଷର ସେ ବାଳୁତ ବୀର

ବାଜି ରାଉତ ନାମ ଅଟେ ତାହାର

ଢେଙ୍କାନାଳ ଜିଲ୍ଲା ନୀଳକଣ୍ଠ ପୁର

ବ୍ରାହ୍ମଣୀ ନଦୀ କୂଳେ ତାହାରି ଘର

ସିପାହୀ ସାଜି ସେ ପ୍ରଜାମଣ୍ତଳର

ବିଦ୍ରୋହୀ ପ୍ରଜାଙ୍କୁ କରୁଥିଲେ ପାର

ଆଶଙ୍କା କରିଣ ଗୋରା ସରକାର 

ଆସିଲେ କରିବାକୁ ଦମନ ତାହାର

ଦେଲେ ସେ ଆଦେଶ କରିଦିଅ ପାର

ଯିବାକୁ ଅଛି ତ ଗଡଜାତ ପୁର

ମାନିଲାନି ସେତ ଆଦେଶ ଶତ୍ରୁର

ନ ଡରିଲା ଶୁଣି ଧମକ ତାଙ୍କର

ଦୃଢ ଭାବେ ରହି ବଚନରେ ସ୍ଥିର

ବୀରଦର୍ପେ ଦେଲା ତାଙ୍କୁ ଯେ ଉତ୍ତର

ଫିଟାଇବି ନାହିଁ ନଉକା ଘାଟର

ଦେବିନି ମଉକା ଗ୍ରାମେ ପଶିବାର

ଉତ୍ୟକ୍ତ ହୋଇ ଇଂରେଜ ସରକାର

ଗୁଳି ବର୍ଷଣ କରିଲେ ତା ଉପର

ରକ୍ଷା କରିବାକୁ ସାଥି ସହଚର

ଢାଳି ଦେଇଥିଲା ନିଜର ରୁଧିର

ଟଳି ପଡିଲା ସେ ପାର୍ଥିବ ଶରୀର

ଲିଭିଗଲା ସଳିତା ତା ଜୀବନର

ସ୍ବର୍ଣ୍ଣାକ୍ଷରେ ଲିପିବଦ୍ଧ ହୋଇଗଲା

ଅମର ଶହିଦ ସେ ମାଟି ମାଆର