ବାଲିରଥ

ଘୋଷ ଯାତରାର ଘଣ୍ଟନାଦ

ବାଦ୍ଯ କାହାଳୀ ବାଜିଲା କାନେ ।

ବଳରାମ ଦାସ ଆସିଲେ ଦଉଡି

ରଥେ ଚଢିଲେ ଯତନେ ।୧।

ଗଳା ଧକ୍କା ଦେଇ ପଣ୍ଡାଏ ତଡିଲେ

ବେଶ୍ୟାଳୟୁ ଆସି ତୁହି ।

ରଥରେ ଚଢୁଛୁ ଏଡେ ଅଲାଜୁକ

ଲାଜ ଟିକେ ତୋତେ ନାହିଁ ।୨।

ଶୁଚିହୀନ ହୋଇ ରଥରେ ଚଢୁଛୁ

ଯାଅ ଏଠାରୁ ପଳାଇ ।

ରହିଲେ ଏଠାରେ ସବୁ ଅପବିତ୍ର

ଭଲ ଗତି ତୋର ନାହିଁ ।୩।

ଅତି ଲଜ୍ଜା ପାଇ ଚଳିଗଲେ ଦାସେ

ବାଙ୍କିମୁହାଣ ପାଖକୁ ।

ଜଗନ୍ନାଥ ସ୍ମରି ବାଲିରଥ ଗଢି

ଡାକିଲେ ଜଗନ୍ନାଥଙ୍କୁ ।୪।

ରଥେ ବିଜେ କର କାଳିଆ ଠାକୁର

ଭାଇ ଭଗ୍ନୀ ଚକ୍ର ସହ ।

ସତେ ମୁଁ ତୁମର ହୋଇଥିବି ଯଦି

ମୋ ରଥେ କର ବିଜୟ ।୫।

ବାଲିରଥେ ପ୍ରଭୁ ବିଜୟ କରିଲେ

ଭାଇ ଭଗ୍ନୀ ସଙ୍ଗେ ଘେନି ।

ତେଣେ ବଡଦାଣ୍ଡେ ନଗଡିଲା ରଥ

ସର୍ବେ ଭିଡି ହେଲେ ତୁନି ।୬।

ଲକ୍ଷ ଲକ୍ଷ ଯାତ୍ରୀ କୋଠିଆ ବେଠିଆ

ହାତୀ ଭିଡି ନନ୍ଦିଘୋଷ ।

ହୋଇଲେ ହାଲିଆ ରଥ ନଘୁଞ୍ଚିଲା

ଭାବିଲେ କି ହେଲା ଦୋଷ ।୭।

ଗଜପତି ରାଜା ହେଲେ ନିଉଛାଳି

ମହାପ୍ରଭୁଙ୍କ ପାଶରେ ।

ଯାହା ଅପରାଧ କରିଅଛି ପ୍ରଭୁ

କ୍ଷମାକର ଦୋଷ ବାରେ ।୮।

ପ୍ରଭୁ କହୁଛନ୍ତି ଭକତକୁ ମୋର

ଅପବାଦ ଦେଲ ରଥେ ।

ବାଙ୍କିମୁହାଣରେ ଅଛି ମୋ ଭକତ

ବସିଛି ମୁଁ ତାର ରଥେ ।୯।

ବୁଝାଇ ସୁଝାଇ ଆଣ ଭକତକୁ

ଗଡିବ ମୋ ନନ୍ଦିଘୋଷ ।

ଗଜପତି ରାଜା ଚଳିଲେ ସେଠାକୁ

ସଙ୍ଗେ ଘେନି ଥାଟ ଘୋଷ ।୧୦।

ବାଲିରଥେ ପୂଜି ଶ୍ରୀଜୀଉମାନଙ୍କୁ

ତୋଷି ବଳରାମ ଦାସେ ।

କ୍ଷମା ମାଗି ତାଙ୍କୁ ପାଟ ଭିଡି ମୁଣ୍ଡେ

ବସାଇଲେ ନନ୍ଦିଘୋଷେ । ୧୧।

ଘର୍ଘର ନାଦରେ ଗଡେ ନନ୍ଦିଘୋଷ

ଭକ୍ତାଧୀନ ପ୍ରଭୁ ମୋର ।

ଭକତର ଅପମାନ ନସହନ୍ତି

କେବେ କାଳିଆ ଠାକୁର ।୧୨।

ଧନ୍ୟ ସେ ଭକତ ବଳରାମ ଦାସ

ଧନ୍ୟ ତାଙ୍କ ବାଲିରଥ ।

ଭକତିରେ ଯାର ବଶୀଭୂତ ହେଲେ

ନିଜେ ପ୍ରଭୁ ଜଗନ୍ନାଥ ।୧୩।