ଅତୁଟ ବିଶ୍ୱାସ
ଅତୁଟ ବିଶ୍ୱାସ
ସ୍ଵପ୍ନମୟ, ଶବ୍ଦମୟ, ବର୍ଣ୍ଣମୟ
ପୂର୍ଣ୍ଣତାରେ ଭରା ପରକାଶ,
ମୁଠାଏ ତ' ଆଶା ଅଦମ୍ୟ ସାହସ
ଜୀବନରେ ଅତୁଟ ବିଶ୍ୱାସ ।
ଆତ୍ମହରା , ଅନୁରାଗେ , ଏ' ଅନ୍ତରୁ
ନିରନ୍ତର ଝରୁଥାଏ କ୍ଲେଶ,
କଳ୍ପନାର ଅଭିସାରେ ବିଚ୍ଛୁରିତ
ରଙ୍ଗୀନ୍ ରଚନାତ୍ମକ ଶ୍ଲେଷ ।
ଆଶା ଆତଙ୍କିତ ଚିତ୍ତ ହନ୍ତସନ୍ତ
ପ୍ରସାରିଛି ରହି ଚତୁଃପାର୍ଶ୍ଵ,
କ୍ଷଣିକ ତା' ଟାଣପଣ ତାତ୍ସଲ୍ୟର
ପୂର୍ଣକୁମ୍ଭା ବିଷାଦ ଓ ହର୍ଷ ।
ଜୀବନଟି ପରି ଜୀବନକୁ ଦେଇ
ନପାଇ କାହା ମୃଦୁ ପରଶ ,
ଯିଏ ଜିଇଁପାରେ ନିଃସର୍ତ୍ତ ଜୀବନ
ହେବନାହିଁ କେବେବି ବିବଶ ।
ପ୍ରସ୍ଫୁଟିତ, ପୂର୍ଣ୍ଣକଳି, ମୁଖଦଳ
ଆରକ୍ତ ଅଧରେ ଭରି ହସ,
ଅନନ୍ତ ଯାତ୍ରାରେ ପ୍ରଭୁ ସମର୍ପିତ
ସେ'ଠି ପୂର୍ଣ୍ଣ ଅତୁଟ ବିଶ୍ୱାସ ।।