ଅସ୍ତରାଗ ଆନ୍ଦୋଳିତ

ମୁଁ ଦେଖିଅଛି, ଦେଖିଅଛି ସେଠି ତୁମ-

    ଆଭିଜାତ୍ୟର ସ୍ଥାପତ୍ୟ,

    ଅୟସର ଆଧିପତ୍ୟ,

    ଆତିଥେୟତାର ସର୍ତ୍ତ,

    ଅନୁସନ୍ଧିତ୍ସୁର ମୂହୁର୍ତ୍ତ |

ମୁଁ ପାଇଅଛି, ପାଇଅଛି ସେଠୁ ତୁମ-

    ଅନୁକମ୍ପାର ଆହତ,

    ଅନୁରାଗର କ୍ଷତ,

    ଆବେଗ ଯା' ଆବୃତ୍ତ,

    ଅପ୍ରାପ୍ତିର ଅବ୍ୟକ୍ତ |

ମୁଁ ଖୋଜିଅଛି, ଖୋଜିଅଛି ସେଠି ତା'ର-    

    ଆରମ୍ଭ ଅପ୍ରତ୍ୟାଶିତ,

    ଅନ୍ତିମ ଅଣାୟତ୍ତ, 

    ଅପେକ୍ଷା କି ଅୟୁତ, ଯା'

    ଅସଂଖ୍ୟ ଅସମାହିତ |

ଅତଏବ, ମୁଁ ଲେଖିଅଛି, ଲେଖିଅଛି ଏଠି ମୋ-

    ଅନିନ୍ଦନୀୟ ଅଭିମତ,   

    ଅବର୍ଣ୍ଣନୀୟ ଅଶ୍ରୁତ, ଯା'

    ଅପ୍ରାସଙ୍ଗିକ ଗୁରୁତ୍ଵ, ସେ  

    ଅସ୍ତରାଗ ଆନ୍ଦୋଳିତ |