ଅର୍ଜିତ ପୁଣ୍ୟର ପ୍ରତିଶ୍ରୁତି ତୁମ

ଅର୍ଜିତ ପୁଣ୍ୟର ପ୍ରୀତି ପ୍ରତିଶ୍ରୁତି

ଅଦୃଶ୍ୟ ବିନ୍ଧାଣି ତୁମେ

ଅନିର୍ବଚନୀୟ ଅମୃତ ସର୍ଜନା

ଅପାନ୍ତେୟ ପଥ ଧାମେ l

ଅସୀମ ତୁମର ସୃଷ୍ଟ ଏ ସଂସାରେ

ଅୟୁତ ଆଶାର ନଈ

ଅମଳିନ ତବ ଅନୁଶାସନରେ

ଅବନୀ ଯାଉଛି ଧାଇଁ l

ଅପରୂପ ତୁମ ସୌନ୍ଦର୍ଯ୍ୟ ସୁଷମା

ଅଜସ୍ର ଶୁଭେଚ୍ଛା ବାଣ୍ଟି

ଅସୁମାରୀ ପାପ ଧୋଇଦିଏ ତୁମ

ଅଧାଗଢ଼ା ତନୁ କାନ୍ତି l

ଅନେକରେ ଏକ ଏକରେ ଅନେକ

ଅସମାପ୍ତ ଚିନ୍ତାଧାରା 

ଅକ୍ଷୟ ଅମ୍ଳାନ ତୁମ ଅବଦାନ

ଅନ୍ତରଙ୍ଗେ ହେଉ ଭରା l

ଅନ୍ତର୍ଯ୍ୟାମୀ ତୁମେ ପତିତପାବନ

ଅନୁସନ୍ଧିତ୍ସାର ଭାବ

ଅନ୍ଧାରି ମୁଲକେ ଆଶାର ଆଲୋକ

ଅପାର୍ଥିବ ଅନୁଭବ l

ଅସରା ଲୁହରେ ଭରା ମୋ ପସରା

ଅଶାନ୍ତ ମୁଁ କାହିଁ କୁହ

ଅଯାଚିତ ତୁମ ପ୍ରେମ ପାରାବାରେ

ଅକୁଣ୍ଠେ ପଖାଳେ ଦେହ l

ଅର୍ଘ୍ୟ ଥାଳି ଧରି ରହିଛି ଅନାଇ

ଅରକ୍ଷିତା ଗୀତାଞ୍ଜଳି

ଅର୍ପଣ କରୁଛି ନିବିଡ଼ ନୈବେଦ୍ୟ

ଅସରନ୍ତି ଶ୍ରଦ୍ଧାଞ୍ଜଳି l