Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Hrushikesh Satpathy

Inspirational


4  

Hrushikesh Satpathy

Inspirational


ଅପୂର୍ବ ଅନନ୍ୟ ଦୃଶ୍ୟ

ଅପୂର୍ବ ଅନନ୍ୟ ଦୃଶ୍ୟ

1 min 23.4K 1 min 23.4K

ଆକାଶକୁ ଚାହିଁ ଅନେଇ ରହିଛି

   ଦେବସ୍ନାନ ପୂର୍ଣ୍ଣିମାକୁ ।

ପୂର୍ଣ୍ଣିମା ଆସିଲା ଆସି ଚାଲିଗଲା

   ଦେଖିଲିନି କାଳିଆକୁ !!


ମୋ' ପାଖରେ ନାହିଁ ସିଧା ପ୍ରସାରଣ

  ଦେଖିବି ମୋ' ଭାଗ୍ୟ କାହିଁ !

କୁବେରପତିଙ୍କ  ଭକ୍ତ ତାଲିକାରେ

   ମୋ' ଭାଗ୍ୟର ନାଁ ନାହିଁ ।।


ଅବଶ୍ୟ ଦେଖିଲି କଳ୍ପନା ଚକ୍ଷୁରେ

   ଅପୂର୍ବ ଅନନ୍ୟ ଯାତ ।

କେମିତି ଦେଖନ୍ତି ପ୍ରତ୍ୟକ୍ଷ ଭାବରେ

    ଚର୍ମ ଚକ୍ଷୁ ବିବର୍ଜିତ ।।


ଭକତିରେ ମୋର ଭାବର ଅଭାବ

   କାଣିଚାଏ ତ ନଥିଲା ।

ଅପ୍ରତ୍ୟାଶିତ ଏ ଭୁତାଣୁ ସଙ୍କଟ

   ଇଚ୍ଛାକୁ ପ୍ରହାର କଲା ।।


ଆହେ ଲୀଳାମୟ ତୁମରି ଲୀଳାର

    ଏ କି ନବ କଳେବର ।

ରୀତିରେ ନୀତିରେ ଗୁପତ ଭାବରେ

    ଗଲ ଗୃହ ଅଣସର !!


ଏ ସ୍ନାନ ପୂର୍ଣ୍ଣିମା ତୁମ ପାଇଁ ସିନା

   ସ୍ନାନ ପାଇଁ ଶୁଭ ଘଡି ।

ମୋ' ପାଇଁ ବିରହ ବିଧୁର ଲଗ୍ନର

    ଅତର୍କିତ ଘଡ଼ଘଡି ।।


ଜ୍ୟେଷ୍ଠ ପୂର୍ଣ୍ଣିମାର ପବିତ୍ର ତିଥିରେ

    ଭକ୍ତଙ୍କର ସମାଗମ ।

କାହିଁ ଗଲା ସେଇ ସ୍ନାନ ମଣ୍ଡପର

    ଅଭିନବ ଆକର୍ଷଣ ??


ସ୍ନାନ ପୂର୍ଣ୍ଣିମାର  ଗୁଟି ପହଣ୍ଡିରେ

   ଲୋକାରଣ୍ୟର ଅଭାବ ।

ଶ୍ରଦ୍ଧାଳୁବିହୀନ ସ୍ନାନ ମଣ୍ଡପରେ

    ଭକ୍ତହୀନ ଭିନ୍ନ ଭାବ ।।


ଶ୍ରଦ୍ଧାଳୁ ଭିଡରେ ଭକ୍ତି ଶରଧାରେ

     ଆସୁଥିଲ ମଣ୍ଡପକୁ ।

ସ୍ନାନ ମଣ୍ଡପ ବି ସଂଯମେ ସଂଭ୍ରମେ

    ସ୍ୱାଗତୁଥିଲା ତୁମକୁ ।।


ହେ କଳା ସାଆନ୍ତ ଅବର୍ଣ୍ଣନୀୟ ସେ

   ସ୍ନାନଯାତ୍ରା ଲୀଳାଖେଳା ।

ବରଷକେ ଥରେ ଶ୍ରଦ୍ଧାଳୁଙ୍କ ପାଇଁ

   ଅନନ୍ୟ ଅମୃତ ବେଳା ।।


ହଳଦୀ ଚନ୍ଦନ   କର୍ପୂର ତୁଳସୀ

   ଶ୍ରୀ ଜୀଉ,ତୁମରି ଲାଗି ।

ଶ୍ୱେତପୁଷ୍ପ ଆଉ  ଅପୂର୍ବ ଟାହିଆ

   ତୁମ ସ୍ନାନ ସହଭାଗୀ ।।


ସେଦିନ ତୁମରି ଦର୍ଶନାଭିଳାଷୀ

   ଭକତ ଅଲାରନାଥ ।

ଦର୍ଶନ ନ ପାଇ ଆତ୍ମ ବିସର୍ଜନ

   ପାଇଁ ତାଙ୍କରି ସିଦ୍ଧାନ୍ତ ।।


ଅନବସରରେ ଶ୍ରୀ ଅଙ୍ଗ ବାଧକି

  ଥାଇ ଦେଲ ସ୍ୱପ୍ନାଦେଶ ।

ବ୍ରହ୍ମଗିରି ଠାରେ ସମୁଦ୍ର ତଟରେ

   ପୂର୍ଣ୍ଣ ହେବ ଅଭିଳାଷ ।।


ନୁହେଁ ମୁଁ ଅଲାର ଦୀନ ଅକିଞ୍ଚନ

   କରିବିନି ଆତ୍ମୋତ୍ସର୍ଗ ।

ଅପେକ୍ଷା କରିବି ଆସନ୍ତା ବର୍ଷକୁ

   ଲଭିବି ଦର୍ଶନ ଯୋଗ !!


ସ୍ନାନ ମଣ୍ଡପରେ  ତୁମ ଦର୍ଶନର

   କୋଟି ପୁଣ୍ୟ ଅଭିଳାଷ ।

ତୁମରି ଇଚ୍ଛାରେ ବିଲୋକି ପାରିବି

   ଅପୂର୍ବ ଅନନ୍ୟ ଦୃଶ୍ୟ !!


Rate this content
Log in

More oriya poem from Hrushikesh Satpathy

Similar oriya poem from Inspirational