ସବୁ ରୂପେ ତୁ ଜନନୀ

ଯଦିଓ ସୂର୍ଯ୍ୟଙ୍କ ଦୁଷ୍ଟାମୀ ବଢିଛି ,

ଜହ୍ନ ଯେ ସେଇ ଶୀତଳ !

ଶରତ ସକାଳ ସୁଶୋଭିତ କରେ 

ସରୋବରେ ଶତଦଳ  !!

ଯଦିଓ କାନ୍ଦୁଛି ଡହଳବିକଳେ 

ନଈପଠା-ଉଷ୍ମବାଲି !

କାଶତଣ୍ଡୀ ଅଧରରେ ସ୍ମିତ ହସ ,

ନାଚେ ସରାଗରେ ଢଳି !!

ସୂର୍ଯ୍ୟଙ୍କର ପ୍ରଖରତା କରେ ସିନା 

ଅଳପ କ୍ଷଣ ଅବଶ !

କ୍ଷଣସ୍ଥାୟୀ ବିପର୍ଯ୍ୟୟର ଆଘାତେ 

ପ୍ରକୃତି ନୁହେଁ ବିବଶ !!

ଶାରଦୀୟ ପୂଜୋତ୍ସବର ସ୍ଵାଗତେ 

ହୋଇଛନ୍ତି ନିୟୋଜିତା !

ତମାଳ , କମଳ , କୁମୁଦ ସାଥିରେ 

ସୁଗନ୍ଧା ଅପରାଜିତା !!

ଗୋଷ୍ଠୀଗତ ଭାବେ ସ୍ୱାଗତ କରନ୍ତି 

ସୁରଭିସିକ୍ତ ନୃତ୍ୟରେ !

ଦୂର ଦିଗ୍ବଳୟେ ଶକ୍ତିପୀଠ ଭିଜେ 

ଶଙ୍ଖଧ୍ୱନି-ମୂର୍ଚ୍ଛନାରେ !!

ଭାରତ ବକ୍ଷରେ ଗୌରବେ ଚାଲିଛି 

ଶାରଦୀୟ ପୂଜୋତ୍ସବ !

ଆର୍ଯ୍ୟ ପରମ୍ପରା ପ୍ରମାଣ କରୁଛି 

ବେଦ-ସଂସ୍କୃତି-ବିଭବ !!

ଶକ୍ତି-ସ୍ୱରୂପିଣୀ ଶୈଳପୁତ୍ରୀଙ୍କର 

ନବରାତ୍ର-ମହୋତ୍ସବ !

ହିନ୍ଦୁ ରାଷ୍ଟ୍ର ଭାରତର ସଂସ୍କୃତିରେ 

ଶକ୍ତି-ତନ୍ତ୍ର-ମନ୍ତ୍ର ପର୍ବ !!

ମହାଗୌରୀ ,କାତ୍ୟାୟିନୀ , କାଳରାତ୍ରି,

କୁଷ୍ମାଣ୍ଡା , ବ୍ରହ୍ମଚାରିଣୀ !

ଚିତ୍ରଘଣ୍ଟା , ସ୍କନ୍ଧମାତା, ସିଦ୍ଧିଦାତ୍ରୀ ,

ଦୁଷ୍ଟ-ସଂହାରକାରିଣୀ !!

ଶାରଦୀୟ ପୂଜା ଅନ୍ତିମ ଦିବସେ 

ବିଜୟାଦଶମୀ ପର୍ବ !

କୁତ୍ସିତ ଚରିତ୍ର ସଂହାର ଭିତ୍ତିରେ 

କରେ ଦୁଷ୍ଟ ଗର୍ବ ଖର୍ବ !!

ମୁଁ ଚାହୁଁନି ମାଆ ପୂର୍ଣ୍ଣ ହେଉ ମୋ'ର 

ସଂକୀର୍ଣ୍ଣ ମନୋକାମନା !

ସାରା ଜଗତର କଲ୍ୟାଣ ପାଇଁକି 

କରେ ସିନା ଆରାଧନା !!

ହିମପୁତ୍ରୀ ତୁହି ଵିଲୋଳହାସିନୀ ,

ଦ୍ବିଭୁଜା , ସହସ୍ରଭୁଜା !

ଚତୁର୍ଭୁଜା , ଅଷ୍ଟଭୁଜା, ଦଶଭୁଜା ,

ବନଦୁର୍ଗା , ମା' ବିରଜା !!

କେଉଁ ନାମେ ତୋତେ ସ୍ମରଣ କରିବି ,

ସବୁ ରୂପେ ତୁ ଜନନୀ !

ମହିଷଙ୍କ ପାଇଁ ମହିଷମର୍ଦ୍ଦିନୀ ,

ଅନ୍ୟଥା ଜଗଜ୍ଜନନୀ !!

ବିଜୟର ପର୍ବ ବିଜୟାଦଶମୀ ,

ଅଧର୍ମକୁ କରେ ନାଶ !

ନାରୀଶକ୍ତି ପ୍ରୋତ୍ସାହନର ପ୍ରତୀକ ,

ଶକ୍ତିର ପୁନର୍ବିନ୍ନ୍ୟାସ !!