ଅଜାଙ୍କ ପଖାଳ କଂସା

କାଳ ବୈଶାଖୀଟା ଲୁଟି ନେଇଗଲା

ପଖାଳ ଦିବସ ମଜା !

ଆଈ ସେପଟରେ ସକେଇ ହେଉଛି ,

ଦୁଃଖରେ ବସିଛି ଅଜା !!

ପଖାଳ ଦିବସ ଅଜାଆଈଙ୍କର

ମନ-ମିଳନ-ମୁହୂର୍ତ୍ତ !

ଆଈ ସାଜିଥାଏ ବାସି ତୋରାଣିକୁ ,

ଯା' ପାଇଁ ଅଜା ତୃଷାର୍ତ୍ତ !!

ବିଶ୍ୱରେ ଚାଲିଛି ପଖାଳ ଦିବସ ,

ଦହି ପଖାଳ ଉତ୍ସବ !

ଆଈଙ୍କ ହାତର ସୁଆଦ ଯେ ଭିନ୍ନ ,

ଥାଏ ଅନ୍ତରର ଭାବ !!

ମୋ' ଆଈ ହାତର ତୋରାଣିରେ ଥାଏ 

ସୁଆଦ ତୋରାଣି ଟଙ୍କ !

ଭୃସଙ୍ଗ, ଧଣିଆ ପତ୍ର ସଙ୍ଗେ ଲଙ୍କା 

ଦେଇ ମାରିଦିଏ ଛୁଙ୍କ !!

କୋଶଳା ଶାଗକୁ ବଡିଚୂରା ସାଥେ

ପୋଡା ବାଇଗଣ ଭର୍ତ୍ତା !

ଚୂନାମାଛ ସଙ୍ଗେ ବିଲାତି ଚଟଣି ,

ଶିଳ ଶିଳପାରେ ବଣ୍ଟା !!

ବାଡ଼ି ଆଡେ ଥିବା ଶାଗ କିଆରୀରୁ

ଆଣିଛି ଓଲି ପିଆଜ !

ଦେଶୀ ପିଆଜର ସୁଆଦ ଅଲଗା ,

ହେଉ ସେ ପଖାଳ ସଜ !!

ଭାବିଥିଲା ଅଜା ଡୁବିଯିବ ଆଜି 

ଆମ୍ବ ଅଦାର ବାସ୍ନାରେ !

ଭାବ ଦିଆନିଆ ବିନିମୟ ହେବ 

ପଖାଳ କଂସା ଆଳରେ !!

ବୟସଟା ସିନା ସରି ସରିଗଲା ,

ଅଜାର ପ୍ରେମ ଅସରା !

ପଖାଳ ଗୁଣ୍ଡାଏ ଭିତରେ ପାଏ ସେ

ଆଈ ପ୍ରେମର ଇସାରା !!

ଅଜାକୁ କି ଜଣା ଆଜି ଏ ଦିନର

ପଖାଳ ଦିବସ କଥା !

ଆଈର ହାତର ସଜ ତୋରାଣିରେ

ହଜିଛି ଅଜାର ମଥା !!

ସାରା ରାଇଜରେ ପଖାଳର ଚର୍ଚ୍ଚା ,

ଅଜା ଜଣେ ଅଂଶୀଦାର !

ଆଈଙ୍କ ସାଥିରେ ମାତି ଉଠିଛି ସେ ,

ପଖାଳରେ ତା' ନଜର !!

ଓଡିଶାବାସୀଙ୍କ ପ୍ରିୟ , ଅତିପ୍ରିୟ ,

ଓଡ଼ିଆଙ୍କ ଅଭିମାନ !

ଧନୀ ହୁଅନ୍ତୁ ବା ହୁଅନ୍ତୁ ଗରିବ ,

ନ୍ୟୁନ ନୁହେଁ ସ୍ୱାଭିମାନ !!

ଖୁସି ଲାଗେ ଆଜି ଓଡ଼ିଆ ଜାତିର

ପାରମ୍ପରିକ ପଖାଳ !

ଦେଶ ବିଦେଶରେ ତା'ର ପରିଚିତି ,

ଗ୍ରାମରୁ ସହରାଞ୍ଚଳ !!

ଅଜାଙ୍କ ପଖାଳ କଂସାରେ ରହିଛି

ବିଶ୍ଵପ୍ରେମ , ଭାତୃଭାବ !

ସ୍ନେହ, ଶ୍ରଦ୍ଧା , ପ୍ରୀତି ଆଦାନପ୍ରଦାନେ

ଅତୁଳନୀୟ ସଦ୍ଭାବ !!