Library
Profile
ସକଳ ଜ୍ୟୋତିର ମହାଜ୍ୟୋତି ତୁମେ
ସକଳ ଜ୍ୟୋତିର ମହାଜ୍ୟୋତି ତୁମେ
ଆକାର ରୂପରେ ନିରାକାର ତୁମେ ,
ସସୀମ ପୃଷ୍ଠରେ ବ୍ୟାପ୍ତ ,ଅସୀମ !
ସଗୁଣ ଗର୍ଭରେ ନିର୍ଗୁଣ ନିର୍ଯ୍ୟାସ ,
ଉପମା ଊର୍ଦ୍ଧ୍ୱେ ତୁମେ ଅନୁପମ !!
ଭାବରେ ଅଭାବ , ଅଭାବରେ ଭାବ ,
ଏକରେ ଅନେକ , ଅନେକେ ଏକ !
ତୁମେ ହିଁ ବିଶ୍ଵାତ୍ମା , ବିଶ୍ୱ ପାଇଁ ଆତ୍ମା ,
ସମଗ୍ର ବିଶ୍ୱ ତୁମରି ଶାବକ !!
ଆକାର ଥାଇ ବି ନିରାକାର ତୁମେ ,
ତୁମ ବର୍ଣ୍ଣମାଳା ଅବର୍ଣ୍ଣନୀୟ !
ଦିବ୍ୟ ପ୍ରତିମା ରୂପରେ ଦୃଶ୍ୟମାନ ,
ତୁମରି ଦର୍ଶନ ଅତୁଳନୀୟ !!
ପଞ୍ଚଭୂତ , ପଞ୍ଚତନ୍ତ୍ର, ଚତୁର୍ବେଦ
ତୁମରି ତତ୍ତ୍ୱର ମହାଦର୍ଶନ !
ସାମାନ୍ୟ ଭିତରେ ଅସାମାନ୍ୟ ତୁମେ ,
ଅସମ୍ଭବ ତୁମ ତତ୍ତ୍ୱ-ଚିତ୍ରଣ !!
<
/p>
ରୂପରେ ଅରୂପ , ଅରୂପରେ ରୂପ ,
ସାଗର ରୂପରେ ମହାସାଗର !
ଆକାଶର ନୀଳିମାରେ ବିସ୍ତାରିତ ,
ଦିଗ୍ଵଳୟେ ଦିଶ ଚିରସୁନ୍ଦର !!
ସାଧାରଣ-ନେତ୍ରେ କ୍ଷୁଦ୍ର, ଅବିକଳ୍ପ ,
ଚେତନା-ନେତ୍ରରେ ତୁମେ ବୃହତ୍ତ !
କାଳ ପାଇଁ ତୁମେ ମହାକାଳ ରୂପୀ ,
ସାରା ଜଗତର ଶ୍ରୀଜଗନ୍ନାଥ !!
ଶ୍ରୀମନ୍ଦିରେ ରତ୍ନସିଂହାସନେ ଥାଇ
ବିଶ୍ୱବ୍ରହ୍ମାଣ୍ଡର ମହାପାଳକ !
ନନ୍ଦିଘୋଷେ ବିଶ୍ୱପ୍ରେମିକ ରୂପରେ
ଦର୍ଶନ କରନ୍ତି ଭକ୍ତ , ଦର୍ଶକ !!
ସକଳ ଜ୍ୟୋତିର ମହାଜ୍ୟୋତି ତୁମେ ,
ତୁମେ ତମସୋ ମା ଜ୍ୟୋତିର୍ଗମୟ !
ଦିବ୍ୟ ଚେତନାର ଚକାନୟନରେ
ଅସ୍ତି ତେଜୋବନ୍ତ ରଶ୍ମିବଳୟ !!
