ଅପରିଚିତ ବ୍ୟକ୍ତି
ଅପରିଚିତ ବ୍ୟକ୍ତି
ଇଏ କିଏ ଇଏ କିଏ ?
କିଏ ସେ ଜାଣିଛ କିଏ ସେ ଚିହ୍ନିଛ
କହତ ଏବେ ଟିକିଏ ॥
କୁଆଡୁ ଆସିଲା ଘରେ ପଶିଗଲା
ଅଜଣା ଅଦେଖା ଇଏ ।
କୁଳ ଶୀଳ ତାର କିଛି ଜଣାନାହିଁ
କିଏ ଜାଣିଛ ଏ କିଏ ?
ଜଣାଶୁଣା ନାହିଁ କେବେ ଦେଖାନାହିଁ
କୁଆଡୁ ଆସିଲା ଇଏ ?
କେହି ଜଣେ ତାକୁ ଚିହ୍ନି ତ ନାହାନ୍ତି
ଅପରିଚିତ ତ ଇଏ ॥
ଘରଲୋକ ସବୁ ଘେରିଗଲେ ଯାଇ
ଅପରିଚିତ ବ୍ୟକ୍ତିକୁ ।
କିଏ ତୁମେ କହ ତୁମ ନାମ ଧାମ
କହିବ ଟିକେ ଆମକୁ ॥
କଅଣ କରୁଛ କେଉଁଠି ରହୁଛ
କାହିଁକି ଆସିଛ କହ ।
ସମସ୍ତଙ୍କ ପ୍ରଶ୍ନ ଶୁଣି ସେ କହିଲା
କହୁଛି ଟିକିଏ ରହ ॥
ପ୍ରଶ୍ନ ଶୁଣି ହଡବଡେଇ ଗଲିଣି
ଏକାଥରକେ ସମସ୍ତେ ।
ପଚାରୁଛ ମୋତେ କି ଉତ୍ତର କହ
କାହାକୁ ଦେବି ମୁଁ କେତେ ?
ଏକମନ ହୋଇ କହୁଛି ସଭିଏଁ
ଶୁଣ ମୁଁ ଅପରିଚିତ ।
ବ୍ୟକ୍ତିଟିଏ ମୁହିଁ ନାହିଁ ମୋ ଠିକଣା
ନାମ ମୋହର ବହୁତ ॥
କୁଆଡେ ଆସିଛି କାହିଁକି ଆସିଛି
କିଛି ମୋତେ ଜଣାନାହିଁ ।
କିଏ ଯଦି ଜାଣ ମୋ ନାଁ ଗାଁ ଠିକଣା
ଦେବ କି ମୋତେ ବତାଇ ॥
ହତବାକ ହେଲେ କଥା ଶୁଣି ତାର
ସଭିଏଁ ହୋଇଲେ ତୁନି ।
ଅପରିଚିତ ଏ କୁଆଡୁ ଆସିଲା
କଥା ତା ବୁଝି ହେଉନି ॥