Library
Profile
ଅନୁଢ଼ା ଆଖିର ସ୍ବପ୍ନ
ଅନୁଢ଼ା ଆଖିର ସ୍ବପ୍ନ
ଅନୁଢ଼ା ଆଖିର ସ୍ବପ୍ନ
ଝୁମୁରୁ ଝୁମୂରୁ ପାଉଁଜି ପିନ୍ଧି
ମୁଣ୍ଡରେ ସୁନ୍ଦର ବେଣୀକୁ ବାନ୍ଧି
ଆସୁ ତୁ ନେଇ ନୂଆ ଆଶାକୁ
କୁନି ଝିଅ ସହ ପଶୁ ବସାକୁ
ଝିଅ ଆଖିର ସେ କଜଳ ଗାର
ଗୋଲାପୀ ଓଠରେ ହସର ଭାର
ନେଇ ମା ବାପାଙ୍କ ସେନେହ ସବୁ
ଝିଅଟି ଆଖିରେ ସଜେଇ ଦେବୁ
କୁଆଁରୀ ମନର କେତେ ଭାବନା
ସାଙ୍ଗସାଥୀ ସହ ଧରି ଖେଳନା
ଖେଳରେ ଖେଳରେ ଜୀବନ ଶିଖେ
ପାଠ ସହ କେତେ ସପନ ଦେଖେ
ବଧୂ ସାଜି ଦିନେ ହୋଇବ ପର
ଆଉ କାହା ପାଇଁ ସେ ତ ଛାଡ଼ିବ ଘର
ଘରଣୀ ହୋଇବ କଣ୍ଢେଇ ରାଣୀ
ସଭିଙ୍କ ମନକୁ ପାରିବ ଜାଣି
ରତନ ସେ ସତେ କେତେ ସୁନ୍ଦର
ଝିଅଠୁ ଆଉ କେ ଅଛି ନିଜର
ଆପଣା ପଣର ଗଣ୍ଠିଲି ଟିଏ
ଝିଅ ନୁହେଁ ସ୍ନେହ ପସରା ସିଏ
ଝିଅ ଦେଖୁଥାଏ ସେହି ସପନ
ନ ମିଳୁ ପଛକେ ଧନ ରତନ
ଦି ମୁଠା ଭାତରେ ଚଳି ପାରିବ
ଯଦି ଜଣେ ମନ କଥା ବୁଝିବ
ମନ ହିଁ ତାହାର ବଡ ଆସରା
ମନ ନ ଚାହିଁଲେ ଧନ ଅସରା
ମନର ମଣିଷ ପାଇବା ପାଇଁ
ଝିଅ ରହିଥାଏ ବାଟକୁ ଚାହିଁ
କନିଆ ଜୀବନ ମା ବାପ ଧନ
ତା ମନ ଧରିବା ତାଙ୍କରି ସ୍ବପ୍ନ
ଯେତେଦିନ ଥିବ ଖୁସିରେ ରହୁ
ଝିଅ ଖୁସି ସବୁ ବାପ ମା ଚାହୁଁ ।
