ଅନ୍ଧ ହୃଦୟ

ମୁଁ ତୁମ ଯନ୍ତ୍ରଣାର କାରଣ ହୋଇଗଲି

ଦେଖି ପାରିଲିନି ତାର କାୟା, ବୋବାଳି

ସବୁ ଦୁଃଖକୁ ବରଦାସ୍ତ କରି ଦେଉଥିଲି

ଆଉ ମୁଁ ଅନ୍ଧ...ଅଧ ବାଟରେ ଝୁଣ୍ଟି ପଡ଼ିଗଲି ।

ହଁ ତୁମେ ଠିକ୍ କଲ, ଛାଡ଼ି ଗଲ ମତେ

ଅନ୍ଧ ଥିଲି ବୋଲି ଜୀର୍ଣ୍ଣ କରି ଦେଉଥିଲି 

ଜଡ଼ ପାଲଟି ଥିବା ତୁମ ବାତାବରଣକୁ

ଏବେ ମୁଁ ବେସାହାରା ପ୍ରେମୀ କଏଦୀଟେ 

ଏ ସଂସାର କାରାଗାର ଭିତରେ ସଜା କାଟୁଛି ।

ଆକାଶ ସଦା ଆମ ମୁଣ୍ଡ ଉପରେ ରହେ

ହେଲେ,ଆମେ ତାକୁ ଅନେକ ଦୂରେ ଖୋଜିଥାଉଁ,

ତୁମେ ବି ସେମିତି ପାଖରେ ରହିଗଲ ବୋଲି 

ଗାନ୍ଧାରୀର ଅନ୍ଧପୁଟୁଳି ପରି ଅନ୍ଧ କରିଦେଲ

ମୁଁ ବୁଝିଗଲି,ଯେ ଅନ୍ଧ ଅନ୍ଧାରେ କେମିତି ବଞ୍ଚିଯାଏ । 

ତାରା ମେଳେ ଜହ୍ନ ରଚେ ଇତିହାସ 

ସେଥିରେ ଗୋଟିଏ ପୃଷ୍ଠା ହିଁ ଦୋହଲାଇ ଦିଏ

ଜୀବନର ଢେର ସାରା ଲିଖିତ ପୃଷ୍ଠାକୁ

ତଥାପି ବେଦନା ଢେଉରେ ନୌକା କାତ ଧରି 

ମାରି ଚାଲିଛି ଉଦେଶ୍ୟହୀନ ନାଉରୀ ବେଶେ ।