ଅମୃତ-ସନ୍ତାନ
ଅମୃତ-ସନ୍ତାନ
ଅମୃତ ସନ୍ତାନ ମୁହିଁ
ଅମୃତ ସାଗରୁ ଜନ୍ମି
ଅମୃତ-ଧାରା ସ୍ବରୂପେ
ଅମୃତ-ଧରାରେ ବହି ।
ଶିଖାଏ ଅମୃତ ବାଣୀ
ମଧୁର ଅମୃତ ଠାଣୀ
ଶୀତଳ ଅମୃତ ନଭେ
ଅମୃତ ରୂପରେ ରହି ।
ଅମୃତ ଶିଶୁର କଥା
ଅମୃତ ଐତିହ ଗାଥା
ଅମୃତ ପ୍ରସ୍ତର ଦେହେ
ଖୋଦିତ ଅମୃତ ଲେଖା ।
ଅମୃତ ଭାଷା ସଂସ୍କୃତି
ଅମୃତ ଉତ୍କଳ ଗୀତି
ଅମୃତ ସ୍ବରୂପେ ବିଜେ
ସ୍ଵୟଂଭୂ ଅମୃତ-ପତି ।
ଅମୃତ ମୋ ଲୋକକଥା
ଅମୃତ ମୋ ଯାନି-ଯାତ୍ରା
ମର୍ତ୍ତ୍ୟ ଅମୃତ ମଣ୍ଡଳେ
ଅମୃତମୟୀ ଓଡ଼ିଶା ।
ଅମୃତ ମୋ ହାଣ୍ଡିଶାଳ
ଅମୃତ କଂସେ ପଖାଳ
ଅମୃତ ଚାଷୀ ସପନେ
ଅମୃତ ସୁନା ଫସଲ ।
ଅମୃତ ମୋ କୋଣାରକ
ଅମୃତ ସେ ଧର୍ମପଦ
ଅମୃତମୟ ଭାସ୍କର୍ଯ୍ୟ
ଅମୃତ ଓଡ଼ିଆ ଶୌର୍ଯ୍ୟ ।
ଅମୃତ ମୋ ଜଗନ୍ନାଥ
ଅମୃତ ମୋ ରଥଯାତ
ଅମୃତମୟୀ ଜନନୀ
ଅମୃତ ତା' ପରିପାଟୀ ।
ଅମୃତ ମୋର ବୈଶାଖ
ଶ୍ରାବଣେ ଝରେ ଅମୃତ
ଶରତେ ଅମୃତ କାନ୍ତି
ବସନ୍ତେ ଅମୃତ ବାସ ।
ଅମୃତ ସନ୍ତାନ ମୁହିଁ
ଅମୃତ ପ୍ରଦେଶେ ଜନ୍ମି
ଶୁଣାଏ ଅମୃତ ବାଣୀ
ଅମୃତ ଧରାରେ ବହି ।