ଅମୃତ ସନ୍ଧାନେ

ଶୃଙ୍ଖଳିତ ଚାଲି ଶିଖ ପିମ୍ପୁଡିଠୁଁ

ସଜାଗ କୁକୁର ଠାରୁ,

ସଞ୍ଚିବା ଶିଖିବା ପାଇଁ ନିଅ ମାନି 

ମଧୁମକ୍ଷିକାକୁ ଗୁରୁ ।

ବୃକ୍ଷ ଠାରୁ ଦାନ ବସୁଧା ସହନ

ଏକାଗ୍ରତା ପାଇଁ ବଗ ,

କିପରି ଭଲକୁ କରିବ ଗ୍ରହଣ

ହଂସ କୁ ପଚାର ଆଗ ।

ଜୀବନ ଦର୍ଶନ ଶିକ୍ଷା ଦିଏ ଶାସ୍ତ୍ର

ସୂର୍ଯ୍ୟ ଦେଖ ନିର୍ବିକାର,

ଈଶ୍ଵର କରୁଣା କେମିତି ମିଳିବ

ଗୁରୁଙ୍କୁ ଥରେ ପଚାର ।

ବିପଦୁଁ ଉଦ୍ଧାର ପାଇବା କୌଶଳ

କଚ୍ଛପ ପାଖରୁ ଶିଖ,

କୁକ୍କୁଟ କାକଠୁଁ ପ୍ରାତେଃ ଶଯ୍ୟା ତ୍ୟାଗ

ବୁଝ ସମୟ ସଠିକ ।

ସଂସାରେ ଜୀବନ ପଦ୍ମ ପତ୍ରେ ପାଣି

ନିଷ୍ଠାରେ ଚାତକ ଭଳି,

ହାତୀର କଇଁଥ ଖିଆରୁ ସୁଖର 

ସନ୍ଧାନ ପାରିବା କଳି ।

ସମୁଦ୍ର ଜଣାଏ ଆନନ୍ଦ ଜୀବନ

କେମିତି କରିବା ଭୋଗ,

ଜୀବନ ହେବନି ନିଷ୍ଫଳ ଥିଲେଟି

ପ୍ରକୃତିଠିଁ ଅନୁରାଗ ।

ଅମୃତମୟ ଏ ସୋମସିକ୍ତ ସୃଷ୍ଟି

ଆମେ ଅମୃତ ସନ୍ତାନ

ଅମୃତ ଆସ୍ବାଦ ପାଇବ ସୃଷ୍ଟିରୁ

କର ଅମୃତ ସନ୍ଧାନ ।