ଅମୃତ ଫଳ

ସଂସାର ଉପବନ ର ଦୁଇଟି କଳିକା 

ଜଣେ ନର ଜଣେ ନାରୀ, 

ଜଣକର ଆଗମନ ଭରିଦିଏ  ହର୍ଷଉଲ୍ଲାସ, 

ହତାଶା ର କଳାମେଘ ଉଠେ ଅନ୍ୟ ପାଇଁ, 

ଏକ ପାଇଁ ଜୀବନ ର ଗତିପଥ ଅତୀବ ସରଳ, 

ଅନ୍ୟ ପାଇଁ କଟକଣା, କଣ୍ଟକିତ ପଥ |

ଜଣକର ଯାତ୍ରା ପାଇଁ ସବୁଜ ସଂକେତ, 

ଲକ୍ଷ୍ମଣ ର ତିନିରେଖା ଅଙ୍କା ଅନ୍ୟ ପାଇଁ |

ଏକଇ ସ୍ରଷ୍ଟା ର ସୃଷ୍ଟି 

ସେ ଦୁଇ ଅମୃତ ଫଳ 

ନିଜ ସ୍ୱାର୍ଥ ପାଇଁ, ଏ ସମାଜ 

ଲଗାଇଛି ନିଷିଦ୍ଧ ମୋହର 

କେହି କେବେ କହିବାର ଶୁଣାନାହିଁ 

ରାମ ପାଇଁ ରାମାୟଣ, ଅବା ମହାଭାରତ ପାଣ୍ଡବ ଙ୍କ ପାଇଁ 

ଯୁଗେ ଯୁଗେ ସୀତା ଓ ଦ୍ରୌପଦୀ 

କାରଣ ଏ ଦୁଇ ମହା ଜାଗତିକ ଘଟଣା ର |

ଯେତେ ନିନ୍ଦା ଅପବାଦ ସହିବା ତା ଧର୍ମ 

ପୋଡା ସଳିତା ଯାହାର ଜୀବନ 

ଯାହା ପାଇଁ ଶୁନ୍ୟତା ର ଅନ୍ୟନାମ ପ୍ରେମ 

ସେ ନାରୀ ମାତୃରୂପା, ବିଶ୍ଵରୂପା 

କାତ୍ୟାୟନୀ ପୁଣି କମଳିନୀ ସ୍ୱରୂପା...||