ଫିକା ଫିକା ରଜ

ବନସ୍ତେ ଆଉ ଗଜ ଡାକୁନାହିଁ 

ଫିକା ପଡ଼ିଲାଣି ରଜ 

ଗାଁ ଗଣ୍ଡା ଏବେ ସହର ଲାଗୁଛି 

ବାସୁନାହିଁ ରଜ ସଜ ||

ଦୋଳିଟା ମୋର ଝୁଲୁ ନାହିଁ ଜମା 

କଟମଟ ଶବ୍ଦ କରି 

ପାନ ମସଲାରେ ପାଟି ଵାସୁନାହିଁ 

 ସୁଆଦ ଯାଇଛି ମରି ||

ବିଦେଶ ଫେରନ୍ତା ବାପା ପାଶେ ନାହିଁ 

ଧନର ଗଣ୍ଠିଲି ପେଡି 

ଝିଅ ଟା ତାହାର ଫୁଲେଇ ହେଉନି 

ଶୋଇଛି ସେ ମନ ମାଡି ||

କରୋନା ଭୟରେ ଶୂନଶାନ ଲାଗେ 

ସହର ବଜାର ଘାଟ 

କାମ ଚଳା ରଜ ପାଳିବେ ଏଥର 

ହେବ ନାହିଁ କିଛି ନାଟ ||

କରୋନା କୁ ଜୟ କରିବା ଆମେ 

ସନ୍ଦେହ ମନରେ ନାହିଁ 

ଆର ବରଷକୁ ପାଳିବା ରେ ରଜ 

ମନ ଉଣା କରନାହିଁ ||

ବସୁମତୀ ମାତା ଶାନ୍ତି ହୋଇଲେ 

ଘୁଞ୍ଚି ଯିବ ସବୁ ଦୁଃଖ 

ପ୍ରକୃତି ସାଥିରେ ଖେଳି ବାନି ଖେଳ 

ଏହି କଥା ମନେ ରଖ ||