ଅମର ହେଲେ ସେ ଆଜି

ମଥାରୁ ମୋହର ପୋଛନା ସିନ୍ଦୁର

ଭାଙ୍ଗ ନାହିଁ ହାତ ଶଙ୍ଖା ,

କଥା ଦେଇଥିଲେ ସଅଳ ଫେରିବେ

ହେବ ତାଙ୍କ ସହ ଦେଖା ।

ଯେଉଁଦିନ ମୋତେ ବାହା ଦେଇଥିଲେ

କହିଥିଲେ ବାପା ହସି ,

'ସୁପାତ୍ରରେ ମୁହିଁ କନ୍ୟାଦାନ କରି

ହେଉଅଛି ଭାରି ଖୁସି ।'

ବିଦାୟ ବେଳାରେ ଆଶୀର୍ବାଦ ଦେଇ

ଆଉଁଶି ଥିଲେ ମୋ ମଥା ,

'ସର୍ଵ ସୁଲକ୍ଷଣୀ ହୋଇଥା' ଲୋ ମାଆ

ବଜର ହେଉ ତୋ ଶଙ୍ଖା ।'

ଅନ୍ୟ ଗୁରୁଜନ ଲୁହ ପୋଛିଦେଇ

ଦେଇଥିଲେ ଶୁଭାଶିଷ ,

'ପାଚିଲା ବାଳରେ ସିନ୍ଦୁର ନାଇଥା'

ଉଜ୍ବଳ ହେଉ ଭବିଷ୍ୟ ।'

ଏତେ ଆଶୀର୍ବାଦ ଥାଉ ଥାଉ ମୋ'ଠି

କରମ ହୋଇଲା ବାମ,

ବୀର ପରି ସିଏ ଦେଶ ଲାଗି ଲଢ଼ି 

ଚଳିଲେ ଅମର ଧାମ ।

ଚାରିଆଡ଼େ ଖାଲି ଅମର ରହେ ସେ

ଧ୍ୱନି ଶୁଭେ ଅହରହ ,

କାହିଁ ପାଇଁ ତେବେ ମଥାରୁ ସିନ୍ଦୁର

ପୋଛିଦେବି ମୋର କୁହ !!

ଦେଶ ଜାତି ହିତେ ବଳିଦାନ ଦେଇ

ଅମର ହେଲେ ସେ ଆଜି ,

ଅଧୁରା ସ୍ୱପ୍ନକୁ ସାକାର କରିବି

ତାଙ୍କ ପ୍ରତିନିଧି ସାଜି ।