ଅଖଣ୍ଡ ସାମ୍ରାଜ୍ୟ
ଅଖଣ୍ଡ ସାମ୍ରାଜ୍ୟ
ବିଶାଳ ସାମ୍ରାଜ୍ୟର ପରିକଳ୍ପନା
ସ୍ବପ୍ନ ଦେଖନ୍ତି ସଭିଏଁ
କେତେ ସତ କେତେ ବାସ୍ତବତା ତାହା
କହିବ କାହାକୁ କିଏ ?
ଯଦି ଦେଖି ଶୁଣି ଚୁପ ରହେ
କ୍ଷେତ କିଆରୀରେ ହାଣ୍ଡି ରଖି ଶିରେ
ପାଳଭୂତ ସମ ଥାଏ
କହିବ କାହାକୁ କିଏ l
ଗୋଟି ଗୋଟି ଘର ଗୋଟି ଗୋଟି ଗାଁ
ବଡ଼ପଣେ ଅକ୍ତିଆର
ଭଲ କାମ ଆଉ ଭଲ କଥାରେ ତ
ଲାଗିଛି କାହା ନଜର
ଉପର ଦିଶେ ସୁନ୍ଦର
ଭିତରଟା ଦିଶେ ପୋଡା ଅଙ୍ଗାର ଯେ
ସାମ୍ରାଜ୍ୟ ଲୋଭ ତାହାର
ବଡ଼ପଣେ ଅକ୍ତିଆର ।
ମାନବ ପଣିଆ ହଜି ଯାଇଅଛି
ଅଭିନୟ ଜୋରଦାର
ଛଳକପଟର ପଶାପାଲି ଖେଳ
ଗାଁ ରାଜ୍ୟ ଅକ୍ତିଆର
ସମ୍ରାଟ ଲୋଭ ଯାହାର
ସାମ୍ରାଜ୍ୟର ଧନ ଦୌଲତର ନିଶା
ପତିତ ନିମ୍ନକୁ ତା'ର ।
ଅଖଣ୍ଡ ସାମ୍ରାଜ୍ୟ ଗଢିବାର ଇଚ୍ଛା
କେବଳ ଥାଏ ସ୍ରଷ୍ଟାର
ଲହୁଲୁହ ପୁଣି ବଳୀଦାନ ଦେଇ
ଗଢଇ କରି ସୁନ୍ଦର,
ସ୍ନେହ ମମତାର ପବିତ୍ର ରଜ୍ଜୁରେ
ସ୍ବପ୍ନ ହୁଅଇ ସାକାର
ଏ ଇଚ୍ଛା ସେହି ସ୍ରଷ୍ଟାର ।