ଅଝଟ ଶ୍ରାବଣ

ଆଖିପତା ତଳେ ଉଙ୍କିମାରେ ସ୍ମୃତି

    ଭସା ବଉଦର ମେଳେ ,

ଖୋଜେ ପଦ ଚିହ୍ନ  ନିଷ୍ପ୍ରଭ ନୟନେ

    ନାଇଛି ମେଘୀ କଜଳେ ।

କମଳିନୀ କାନ୍ଦେ ସରସୀ ଜଳରେ

     କୁମୁଦିନୀ ଦିନ ଗଣେ ,

ସନ୍ତାପିତ ହୃଦେ ଜାଗେ ଏକ ଆଶା

    ସର୍ ସର୍ ସମୀରଣେ ।

କୁମୁଦିନୀ ଚୁପେ  ଚାହିଁଛି ଆତୁରେ

   ନୟନର କୋଣେ କୋଣେ ,

ଢ଼ାଳି ଲୁହଧାରା   ନୀରବ ନିଶ୍ଚଳେ

    ପଥହରା ମୁଁ 'ତ ଜଣେ ।

ନୀରବ, ନିଷ୍ପ୍ରାଣ  ନିବୃତ କୋଣରୁ

    ସାଉଁଟା ସ୍ମୃତିକୁ ଯୋଡେ ,

ଅଝଟ ଶ୍ରାବଣ  ଭିଜା ମାଟି ତଳେ

    ମିଠା ପ୍ରତିଶ୍ରୁତି ଲୋଡ଼େ ।

ତୁଟିନି ଭରସା   କରିଛି ପ୍ରତୀକ୍ଷା

   ରଙ୍ଗ ବୋଳିଦେଇ ମନେ ,

ପୂର୍ଣ୍ଣମୀ ତିଥିରେ  ସାଗରେ ତରଙ୍ଗ 

     ଉଠେ ଆକର୍ଷଣେ ଯେହ୍ନେ ।

 ମନ ଛନ୍ନ, ଛନ୍ନ   ହୁଅଇ ଉଚ୍ଛନ୍ନ

     ମେଘ ମାଳା ବାରିଧିରେ ,

 ଅଝଟ ଶ୍ରାବଣ   ଅଭିସାର ପାଇଁ

     ଆଜିବି ଏ ' ମନ ଝୁରେ ।