ଅଜା ହେଲେ ଖପା
ଅଜା ହେଲେ ଖପା
ମୋ ବୋଉଙ୍କ ବୋପା ଅଜା ହେଲେ ଖପା
ଦେଖି ନାତିଙ୍କର ଗୁଣ
ଆସରେ ନାତିଏ କହିବି କଥାଏ
ମନ ଦେଇ ସବୁ ଶୁଣ ।
କୁହ ସଦା କେତେ ମରହଟି ମୋତେ
ପାଚିନି ମୁଣ୍ଡରେ ବାଳ
ଝଡ଼ି ନାହିଁ ଦାନ୍ତ ନିରୋଗ ମୋ ସ୍ୱାସ୍ଥ୍ୟ
ଦେହରେ ହାତୀଏ ବଳ ।
ବୟସ ଛୁଇଁଲା ତିନିକୋଡ଼ି ଅଧେ
ଏବେ ମୁଁ ବୁଲାଏ ହଳ
କୁସ୍ତି କସରତ ପାଣି ପହଁରା ତ
ମୋର ବାଁ ହାତ ଖେଳ ।
ଖାଉଥିଲୁ ଆମେ କ୍ଷୀର ଘିଅ ଦହି
ସାରୁ ତରକାରୀ ପେଟେ
କୋଳଥ ଡାଲିରେ ମାଛ ବେସରଟି
ବଗଡ଼ା ଭାତର ସାଥେ ।
ଆମ୍ବ ପଣସଯେ ଭରା ଥିଲା ଏଠି
ବାଡ଼ି ବାଇଗଣ ଲଙ୍କା
ଚୁନା ପକା ଶାଗେ କଞ୍ଚା ଲଙ୍କା ଖଣ୍ଡେ
ମନ ମୋହି ନିଏ ଏକା ।
ସଜାଳୁ ଉଠିଲେ ଚୁଡା ମୁଢି ଗୁଡ଼
ଥିଲା ଆମ ଜଳଖିଆ
ପାକୃତିକ ଖାଦ୍ୟ ପ୍ରକୃତି ଦାତବ୍ୟ
ରହିଅଛୁ ନିରୋଗିଆ ।
ତୁମେ ମାନେ ଖାଅ ମ୍ୟାଗି ଫାଷ୍ଟଫୁଡ୍
ଅପମିଶ୍ରଣର ଖାଦ୍ୟ
କୋଢିଆ ହୋଇଲ କାମକୁ ଡ଼ରିଲ
କହିଲେ କରୁଛ ବାଦ ।
ପରିଶ୍ରମ କେବେ କରୁନ ସରାଗେ
ମେସିନ କରୁଛି କାମ
କୁସ୍ତି କସରତ ଦେଖିନି ତ କେବେ
ମୋବାଇଲ କଲା ବାମ ।
ଯୁଆନ ବେଳରେ ବହୁମୂତ୍ର ରୋଗ
ଶହକରେ ଅଶୀ ଭାଗ
ହାର୍ଟ ଆଟାକ ଉଚ୍ଚ ରକ୍ତଚାପ
କେତେ ନୂଆ ନୂଆ ରୋଗ ।
ମୁଣ୍ଡ ବାଳ ପାଚେ ଅଳପ ଦିନରେ
ବୁଢା ଭଳି ଦିଶ ଟୋକା
ତୁମେ ଏଇଥିରେ ଚାତର ମାରରେ
ଭାବୁଛକି ମୋତେ ବୋକା ।