ଅଦୃଶ୍ୟ ଶକ୍ତି ବାପା
ଅଦୃଶ୍ୟ ଶକ୍ତି ବାପା
ବା-ରେ ପବନ ସେ ପା-ରେ ପାଣି
ସମସ୍ତେ ଛନ୍ତି ଜାଣି
ଦୁଇ ଅକ୍ଷର ଯେବେ ମିଶଇ
ବାପାଙ୍କୁ ଆଣେ ଟାଣି l
ପାଷାଣ ପରି ସବୁ ସହିକି
ଦିଅନ୍ତି ଆମେ ଦାନା
ଜୀବନ ଯାକ କଷ୍ଟ ସହନ୍ତି
କାନ୍ଦିଆ ତାଙ୍କୁ ମନା l
ଦିବା ଓ ରାତ୍ର କରନ୍ତି ଶ୍ରମ
ଦେଖିନୁ ତାଙ୍କ ଥକା
ସବୁରି କାମେ ଦେଖୁ ସଫଳ
କରନ୍ତି ସିଏ ଏକା l
ତାଙ୍କରି ଶ୍ରମେ ମରିଛି ଭୋକ
ପେଟରେ ନେଇ ଦାନା
ଉପାସେ ଭୋକେ ରହନ୍ତି ନିଜେ
ପାଟି ଖୋଲିବା ମନା l
ସ୍ନେହ ଆଦର ଦିଅନ୍ତି ବାଣ୍ଟି
ଆନନ୍ଦ ମିଳେ ସିନା
ବାଣ୍ଟି ସାରିଲେ କିଛି ନଥାଏ
ନିଜ ଖୁସିଟା ମନା l
ଉପଦେଶରେ ମିଳେ ସୁନାମ
ଲମ୍ବିଛି ଫୁଲ ହାର
ଦିଶେନି ତାଙ୍କ ଟାଣୁଆ ସୂତା
ଫୁଲ ହାର ଆଧାର l
ଦୁଗ୍ଧ ମଧ୍ୟରେ ଅଦୃଶ୍ୟ ଘୃତ
ପଛରେ ମେରୁଦଣ୍ଡ
ସବୁ ସଫଳ ତାଙ୍କରି ପାଇଁ
ଦେଖେ ସାରା ବ୍ରହ୍ମlଣ୍ଡ l
ଖାଦ୍ୟ ଭିତରେ ସେ ଲବଣ
ସ୍ୱାଦର ମୁଖ୍ୟ ଧାର
ଖାଦ୍ୟରେ ଯେବେ ଅଭାବ ଆସେ
ଖୋଜେ ସନ୍ତାନ ତାର l
ଜୀବନେ ଆସେ ଯେତେ କଟୁକ୍ତି
ସହିଛି ଯେଉଁ ନର
ସେ କେହି ନୁହେଁ ଆମରି ସ୍ୱର୍ଗ
ପୂଜ୍ୟ ପିତା ଆମର l
ପୂଜା ସମ୍ମାନ କିଛି ମିଳେନି
ଜୀବଦ୍ଦଶାରେ ତାଙ୍କ
ଦିନେ ଶ୍ରମିକ ରାତ୍ରେ ପ୍ରହରୀ
ଜୀବନେ ଥାଏ ବାଙ୍କ l
ପଞ୍ଚଭୁତରେ ମୁଖ୍ୟ ଆୟୁଦ୍ଧ
ପାଣି ପବନ ଆମ
ନିସ୍ଵାର୍ଥେ ଦେଖୁ ସନ୍ତାନେ ପ୍ରେମ
ସଫଳ ସବୁ କାମ l
ଧନ୍ୟ ହେଁ ବାପା ରହିଛ ସଦା
ଆମ ମୁଖ୍ୟ ଆୟୁଧ
ପ୍ରଚ୍ଛଦ ପଟେ ଆମ ନାୟକ
ଜୀବନେ ନାହିଁ ବାଧ ।
ବା-ରେ ପବନ ସେ ପା-ରେ ପାଣି
ସମସ୍ତେ ଛନ୍ତି ଜାଣି
ଦୁଇ ଅକ୍ଷର ଯେବେ ମିଶଇ
ବାପାଙ୍କୁ ଆଣେ ଟାଣି ।