ଅଦୃଶ୍ୟ ନାଗଫାଶ

ସବୁଆଡେ ଆଜି ଶୁଭେ ହାହାକାର ଭୟାତୁଳ ପରିବେଶ ଯୁଆଡେ ନଜର ବୁଲାଇ ଆଣିବ ମରଣର ସମାବେଶ ।

ହୃଦୟ ନଦୀରେ ସୃଷ୍ଟି ହୋଇଅଛି ଅଦେଖା କୋହର ବନ୍ୟା ମଣିଷ ମଣିଷ ରହୁଛି ଦୂରେଇ ସତେ କି ଶାପିତ କନ୍ୟା ।

ଛୁଆଁ ଅଛୁଆଁର ଭେଦ ଭାବ ଖେଳ ଆରମ୍ଭ ହୋଇଛି ପୁଣି

ଅଛୁଆଁ ମାନବ ରୁହେ ସୁରକ୍ଷିତ ଛୁଆଁର ପଡ଼େ ଭାଳେଣି ।

ଗରିବ ମରୁଛି ଧନୀ ବି ମରୁଛି ଅନ୍ତର କେବଳ ଦିନ

ଅମ୍ଳଜାନ ବିନା ଯାଉଛି ଜୀବନ ଯେହ୍ନେ ଜଳଚର ମୀନ ।

ବିଜ୍ଞାନ ବଳରେ ବଳିୟାନ ହୋଇ ପ୍ରକୃତିକୁ କରି ନାଶ

ସମାଜ ବେକରେ ଝୁଲାଇ ଦେଇଛି ଦୃଶ୍ୟହୀନ ନାଗଫାଶ ।

ସୃଷ୍ଟିର ସନ୍ଧାନ କରୁ କରୁ ତା'ର ଭବିଷ୍ୟତ ସନ୍ଦିହାନ

ପ୍ରତି ମୁହୂର୍ତ୍ତରେ ଯୁଝୁଛି ଆଜି ସେ ବଦଳିଛି ଆଚରଣ ।

ଆସ୍ତିକ ନାସ୍ତିକ କଣ୍ଠେ ବିରାଜିତ ପ୍ରଭୁ ତୁମେ ରକ୍ଷା କରମାରିଲେ ମାରିବ ତାରିଲେ ତାରିବ ଆମେ ବି ତୁମ ସୃଷ୍ଟିର ।