ଅଧପେଟେ ହସ

ଆମ ଗାଆଁ ଧୂଷା ପେଟ କାବୁରିଆ 

ସହିପାରେ ନାହିଁ ଭୋକ

ଟାଉଟାଉ ହୋଇ ଗେଫିବାରେ ସିଏ 

ମହାରଥ ସର୍ବଭକ୍ଷ ।

ଗଲା ଦଶହରା ପୂଜା ଅବସରେ

ସାଙ୍ଗ ସାଥି ହୋଇ ମେଳି

ଯାଇଥିଲୁ ଆମେ କଟକ ଓ ପୁରୀ

ଭୁବନେଶ୍ବରକୁ ବୁଲି ।

ଅଟକିଲା ଗାଡି ବାଟରେ ମଝିରେ

କରିବାକୁ ଜଳଯୋଗ 

ପରଶା ହୋଇଲା ପାଉଁରୁଟି ସହ

ଗିଲାସେ ଗରମ ଦୁଗ୍ଧ ।

ବିଳମ୍ବରେ ଖୋଜି ଆଣିଲା ବେଳକୁ

ଚିନି ମୋଡା ସବୁ ପୁଡା

ଗେଫି ସାରିଥିଲା କ୍ଷୀର ପାଉଁରୁଟି

ବିକଳା ଧୂଷା ବାପୁଡା ।

କ୍ଷୀରରେ ସଭିଏଁ ଗୋଳାଇ ଚିନିକୁ

ଖାଉଥିଲେ ରୁଟି ମିଠା

ରଡମଡ ଚିନି ଚୋବାଇ ପାକୁଳି

ଧୂଷା ମୁହଁ ଅଠା ଅଠା ।

ଗାମୁଛାକୁ ପାରି ହେଲା ଲମ୍ବ ଖମ୍ବ 

ପିଟିଛାଟି ଭିଡିମୋଡି

ତାଟକା ହୋଇଲେ ସବୁ ସହଯାତ୍ରୀ

ବିଷମ ଧୂଷା ବେମାରୀ ।

ଖାଦ୍ଯ ପାଉଁରୁଟି ପାକେଟର କ୍ଷୀର

ହୁଏତ ବାସି ଦୂଷିତ

ଭୟେ ଫିଙ୍ଗିଦେଲେ ନଖାଇ ସଭିଏଁ

ଘେରିଗଲେ ଚାରିପଟ ।

ଡାକିଲେ ହଲାଇ ଉଠ ଧୂଷାଭାଇ

କିପରି ଲାଗୁଛି ଦେହ

ଧଡପଡ ହୋଇ ଉଠିକି କହିଲା

ଘାରେ ଟିକେ ଛାଇନିଦ ।

ଚିନିକୁ କ୍ଷୀରରେ ମଅଠେ ଗୋଳାଇ 

ତୁମେ ଖାଉଥିଲ ରୁଟି

ପଛରେ ଚିନିକୁ ଚୋବାଇ ମୁଁ ପେଟେ

କରୁଥିଲି ଫେଣ୍ଟାଫେଣ୍ଟି ।

ଧୂଷାର ଏମନ୍ତ ସରସିଆ ବୁଦ୍ଧି

କୋଉଠି ଥୋଇବ କୁହ

ହସିପାର ତୁମେ ଦାନ୍ତ ଚିପିଚାପି 

ମୁଚୁକୁନ୍ଦ ରଜାପୁଅ ।

ଲାଗିପାରେ ମିଛ ଶୁଣିବା ଲୋକକୁ

କଥାଟା ନିରାଟ ସତ

ଅଧାପେଟେ ହସ ଚାପିକି ଆମେ ତ

ଅବଶ୍ଯ ହତଚକିତ ।