ଅବୁଝା ମନ
ଅବୁଝା ମନ
ଅବୁଝା ମନ ମୋ ବୁଝୁନାହିଁ ଜମା
ମଣିଷ ଚାଲି ଚଳଣି,
ବୁଝି ପାରୁନାହିଁ ମଣିଷ ପଣିଆ
ଲୋପ ପାଇ ବସିଲାଣି ।
ଅନ୍ୟାୟ ଦୁର୍ନୀତି କରୁଛି ରାଜୁତି
ଖୁଣ ହତ୍ୟା ଭୟ ଭ୍ରାନ୍ତି,
ବିବେକ ହୀନତା ସ୍ୱାର୍ଥରେ ବ୍ୟଗ୍ରତା
ମରିଯାଉଅଛି ଶାନ୍ତି ।
ବୁଝୁ ନାହିଁ ମନ କେମିତି ଚାଲିବ
ଆସୁଥିବା ଭବିଷ୍ୟତ,
ସ୍ନେହ ଶ୍ରଦ୍ଧା ଦୟା ଲୋପ ପାଉଅଛି
କେମିତି ମେଣ୍ଟିବ କ୍ଷତ ।
ବିଜ୍ଞାନ ପ୍ରଯୁକ୍ତି ବିଦ୍ୟାର ଉନ୍ନତି
ହେବ କି ମହା ବିପଦ,
ଶିକ୍ଷିତ ମଣିଷ କୁକର୍ମରେ ଲିପ୍ତ
ଗ୍ରାସୁଛି ନିଶା ଓ ମଦ ।
ପୁରୁଣା ଦିନ ମୋ ମନେ ପଡୁଅଛି
ଗୋଟି ଗୋଟି କରି ଆଜି,
ଶାନ୍ତ ପରିବେଶ ସଂସ୍କୃତି ସଂସ୍କାର
ସୁଖେ ପରସ୍ପର ମଜ୍ଜି ।
ଖୋଜୁଛି ଆଜି ମୁଁ ଝୁରୁଛି ଆଜି ମୁଁ
ଖୁସିର ସେ ପିଲାଦିନ,
ଆଧୁନିକତାର ଅପସଂସ୍କୃତିକୁ
ବୁଝୁନି ଅବୁଝା ମନ ।