ଛଳନାର ଦୀପ ଜାଳନା ସାଥୀ

ସାତ ଜନମକୁ ଏକାଠି ରହିବା

ସାକ୍ଷୀ ଥିଲା ଦିନେ ଦୀପର ଜ୍ୟୋତି

ତାକୁ ଭୁଲିଯାଇ ଜୀବନ ବେଦିରେ

ଛଳନାର ଦୀପ ଜାଳନା ସାଥୀ ।

ତାହା ଜୀବନକୁ ଆଲୋକ ବଦଳେ

କରି ଦେଉଥିବ ଅନ୍ଧାରମୟ

ସୁଖ ଅପସରି ଦୁଃଖକୁ କୋଳେଇ

ଜିଇଁବା ହୋଇଯିବ ଦୁଃର୍ବିସହ ।

ଛଳନାଠୁ ବଳି ଘୃଣ୍ୟ ଆଚରଣ

ନାହିଁ କିଛି ଜାଣ ମାନବ ପାଇଁ

ସତ୍ୟର ପ୍ରକାଶ ହୃଦୟର ଦୁଃଖ

ହରି ନେବାପାଇଁ ବାଟ କରଇ ।

ଛଳନା ଭାଙ୍ଗଇ ବିଶ୍ବାସ ଭରସା

ଆଶା ରହିଯାଏ ଅପୂର୍ଣ୍ଣ ହୋଇ

ଏମିତି ଦାମ୍ପତ୍ୟ ଜୀବନେ କି ଲାଭ

ଯେଉଁଠି ଆପଣାପଣ ନଥାଇ ।

ଏକାଠି ଜିଇଁବା ଏକାଠି ମରିବା

ଶପଥେ କି କେବେ ଥାଏ ଛଳନା 

କେଉଁ ବିବଶତା ବଦଳାଇ ଦେଲା

ଆଜି ପ୍ରିୟତମ ମନ ଭାବନା ?

ଚେତାଇ ଦେଉଛି ଏ ଦୀପ ଲିଭାଇ

ବିଶ୍ଵସ୍ତ ଦୀପରେ ହୃଦ ସଜାଅ

ଦେଖିବ ସେ ଦୀପ ଦୀପ୍ରିକୁ ମେଲାଇ

ଜୀବନେ ଜଳୁଥିବ ଅହରହ ।