ନାରୀ ନୁହେଁ ନାରାୟଣୀ

ଶକ୍ତି ସ୍ୱରୂପିଣୀ ତୁ ହି ମା ଜନନୀ

ପରମ ଶାନ୍ତି ଦାୟିନୀ,

ସୃଷ୍ଟି ବିଲୟର ତୁ ଆଦ୍ୟା କାରିଣୀ 

ନାରୀ ନୁହେଁ ନାରାୟଣୀ ।

ସୃଷ୍ଟି କାରିଣୀ ତୁ ଜଗତ ପାଳିନୀ

ସକଳ ଦୁଃଖ ହାରିଣୀ,

ଜନନୀ ଭଗିନୀ ଶାନ୍ତି ପ୍ରଦାୟିନୀ

ତୁ ହିଁ ପ୍ରଳୟ କାରିଣୀ।

ତୁମେ ତ ସାବିତ୍ରୀ,ଅହଲ୍ୟା ଓ କୁନ୍ତି

ନାରୀ ତୋ ରୂପ ଅନେକ,

ତୁମେ ପ୍ରେମ, ପ୍ରୀତି ତୁମେ କ୍ଷମା, ଭୀତି

ତୁମେ ଜଗତ ପାଳକ।

ତୁମେ ତ ଦୁହିତା ଦୁଇକୂଳ ହିତା

ପୁରାଣ ଯୁଗର ସୀତା,

କେବେ ତୁମେ ଲତା କବିର କବିତା

ତୁମେ ତ ଜଗତଜିତା ।

ତୁମ ଯାଦୁକରୀ ପରଶେ ଗୋ ପୁଣି

ଘରଟି ସ୍ବର୍ଗ ପାଲଟେ

ତୁମ ଅବଦାନ କଳନା ନାହିଁ ଗୋ

ମମତାର ନଈ ତଟେ।

ନାରୀ ବିନା ସ୍ଥିତି ନାହିଁ ତ ଜଗତେ

ନାରୀ ହିଁ କାର୍ଯ୍ୟ କାରିଣୀ,

ନାରୀ ରୂପେ ତୁମେ ନାରାୟଣୀ ପୁଣି

ଅସୀମ ଶକ୍ତି ଧାରିଣୀ ।