ବସନ୍ତେ ବସନ୍ତରାସ
ବସନ୍ତେ ବସନ୍ତରାସ
ଗଗନରେ ଦୋଳପୂର୍ଣ୍ଣିମା ଚାନ୍ଦ,
ଦୋଳ ବିମାନରେ ଦୋଳ ଗୋବିନ୍ଦ,
ମତ୍ତହସ୍ତୀ ମନ୍ଦ ଗତି,
ବେଢ଼ି ରହିଛନ୍ତି ବିଭୋର ଭକତ,
ଯଥା ରାସେ ଗୋପୀପନ୍ତି l
ଭକତେ ନାଚନ୍ତି ବାହୁ ଉଠାଇ,
ଘଣ୍ଟ ଘଣ୍ଟା ନାଦେ ତାଥେଇ ଥେଇ,
ଦାଣ୍ଡ ପଡ଼ଇ ଉଛୁଳି,
ବେଢ଼ିଛନ୍ତି କିବା ନିଶିଥ ଗଗନେ,
ଚନ୍ଦ୍ରମାକୁ ତାରାବଳୀ l
ପିଚକାରୀ ହାତେ ମଧୁସୂଦନ,
ଅବିର, ଝାଲର, ବାସ ଚନ୍ଦନ,
ଆଲଟ ଚାମର ଧାଡ଼ି,
ଫଗୁଣର ଫଗୁ ଫଗୁଆ ଉଡ଼ଇ
ଗୋପାଳ ଖେଳ ଲଉଡ଼ି l
ବନ ଫୁଲ ହାରେ ଶ୍ରୀଵନମାଳୀ,
ଗଳେ ଲମ୍ବିଅଛି ନିଆଳି ମାଳି,
ଦିଅ ସର୍ବେ ହୁଳହୁଳି,
ହେ ଲୀଳାବିଧୃତ କଳେବର ତୁମ୍ଭ
ଲୀଳା କେ ପାରିବ କଳି l
ବିରହ ବିଧୁରା ଚକୋର ଡାକ,
ଆମ୍ରକୁଞ୍ଜେ ଡାକେ ମଧୁରେ ପିକ,
ବସନ୍ତେ ବସନ୍ତ ରାସ,
ଦ୍ଵାରୀଭୋଗ ମାଗି ଭକତ ଦୁଆରେ
ଉଭା ପ୍ରଭୁ ପୀତବାସ l
ଲୀଳା ରଚିଛନ୍ତି ଭଵ ନାୟକ,
କାମଦେବ ଧରି ପଞ୍ଚ ସାୟକ,
ଜନମନ ନେତ୍ର ହରେ,
ଜୟ ଜୟ ରାଧା ଗୋବିନ୍ଦ ମାଧବ,
ଜୟ ଜଗଦୀଶ ହରେ l
ଚିତ୍ତ ବିନୋଦିଆ ପରମାନନ୍ଦ,
ଗୋପ ଗୁଆଳୁଣୀ ଚିତ୍ତବିନୋଦ,
ଆନନ୍ଦ କନ୍ଦ ଶ୍ରୀହରି,
ଜୟ ଜୟ ଜୟ ଭବାବ୍ଧି ନାୟକ,
ପାରିକର ଭଵ ବାରି ।