ସାର୍ବଭୌମ ଆମ ଦେଶ

ପୂଜ୍ୟ ମାହାତ୍ମା ଗାନ୍ଧୀଙ୍କର ସେହି

ଅହିଂସା ମନ୍ତୁରା ବାଡି

ଦେଖି ପଳେଇଲା ଇଂରେଜ ଶାସକ

ଆମ ଏ ଦେଶକୁ ଛାଡି ।

ଆମ ଦେଶ ଆମେ ଶାସନ କରୁଛୁ

ରହିଅଛି ସମ୍ବିଧାନ

ଲୋକ ପ୍ରତିନିଧି ବାଛନ୍ତି ଜନତା

କରି ନିଜ ମତ ଦାନ ।

ସାର୍ବଭୌମ ସାଧାରଣତନ୍ତ୍ର ଦେଶ

ଆମ ଏ ଭାରତବର୍ଷ

ମହିମା ମଣ୍ଡିତ ଐତିହ ଆମର

ସ୍ୱୀକୃତି ଦେଇଛି ବିଶ୍ୱ ।

ନାହିଁ ଜାତି ଧର୍ମ ଭେଦଭାବ ଏଠି

କରନ୍ତି ସମସ୍ତେ ବାସ

ସେଥିପାଇଁ ଆମେ ଗର୍ବେ କହୁ ଆଜି

ଧର୍ମ ନିରପେକ୍ଷ ଦେଶ ।

ଦେଶର ଜନତା ମଧ୍ୟରେ ଏକତା

ସବୁଠୁ ଗୁରୁତ୍ୱପୂର୍ଣ୍ଣ

ଏକତା ନଥିଲେ କେତେବେଳେ ପୁଣି

ହୋଇଯିବା ପରାଧୀନ ।

ବିଚ୍ଛିନ୍ନତା ସ୍ୱର ଶୁଣାଯାଏ ଆଜି

ଅସ୍ଥିର ବିଭିନ୍ନ ପ୍ରାନ୍ତ

ଉତ୍ତୁଙ୍ଗ ସ୍ୱରେ ମାଗନ୍ତି ଆଜାଦୀ

ନୁହେଁ ଏ ଶୁଭ ସଂକେତ ।

ଆଜି ଏ ତ୍ରିରଙ୍ଗା ତଳେ ଆମେ ସବୁ

ନେବାରେ ବଜ୍ର ଶପଥ

ଅଖଣ୍ଡ ରଖିବା ଦେଶକୁ ଆମର

ସଦା ଥିବ ସୁରକ୍ଷିତ ।