ଅଭକ୍ତର ସ୍ୱୀକାରୋକ୍ତି

ଭକତଟିଏ ମୁଁ କହିବା ପାଇଁକି

ଲେଉଟୁନାହିଁ ମୋ ଜିଭ

ଭକ୍ତି ବୋଲି କିଛି ମୋ ଭିତରେ ନାହିଁ

ନାହିଁରେ ଭକତି ଭାବ I

ପାପର ମାଳା ମୁଁ ଲମ୍ବାଇଛି ଗଳେ

ମଥାରେ ପାପର ଭାର

ପାପ ଚକ୍ଷୁ ନେଇ କେମିତି କାଳିଆ

କରିବି ଦର୍ଶନ ତୋର I

ଭାବଗ୍ରାହି ତୁହି ଭାବର ଠାକୁର

ସରବେ ବୁଲନ୍ତି କହି

ତା ହେଲେ ତୁ ମୋତେ ଭକତିର ମାର୍ଗ

କିଆଁ ଦେଖାଇଲୁ ନାହିଁ I

ଚାଲି ଚାଲି ବାଟ ଥକିଗଲି ବୋଲି

ମନେ ପଡିଲା ତୋ କଥା

ତୋତେ ଯେ ଡାକଇ ତୁ କାଳେ ତାହାର

ହରି ନେଉ ସବୁ ବ୍ୟଥା I

ସରି ଆସିଲାଣି ଜୀବନ ମୋହର

ଡାକିନି ତୋତେ ମୁଁ ଦିନେ

ଦୁଃଖେ ପଡି ଆଜି ଅବେଳେ ଡାକୁଛି

ଶୁଣିବୁ କି ଟିକେ କାନେ I

ଭକତ ତୋହର ହେବାପାଇଁ ଜଗା

ବଳିଛିରେ ମୋର ମନ

କେମିତି ତୋ ପାଦେ ସମର୍ପିବି ମୋତେ

କହିଦେ ଚକାନୟନ I