ଅଭିନନ୍ଦନ ଶୀତରାଣୀ

କେବଳ ଆଖିରେ ନୁହେଁ ମୋ ଆତ୍ମାରେ

ଉକୁଟୁଛି ତୁମ ପ୍ରତିଚ୍ଛବି

ଭାରି ଖୁସି ଲାଗେ ତୁମେ ଆସିଗଲେ

ମନ ହୁଏ ତୁମ କଥା ଭାବି ।

ଦେହ ତୁମ ଫୁଲ ପରି ବାସେ ମହମହ

ହସେ ରଙ୍ଗ ଇନ୍ଦ୍ରଚାପ ଛିଟା

ଉଷ୍ମ ତୁମ ଆବେଗରେ ନିବିଡ ସଂସର୍ଗେ

ଭରିଯାଏ ପ୍ରାଣେ ମାଦକତା ।

ତୁମ ସ୍ପର୍ଶେ ଉଜ୍ଜ୍ବଳେ ଚନ୍ଦ୍ର ସ୍ନିଗ୍ଧତା

ନୀଳ ଜଳେ ସ୍ବଚ୍ଛ ନିର୍ମଳତା

ବୋଳି ହୋଇ କିରଣ ଚନ୍ଦନ ଗନ୍ଧ

ସୁକୋମଳ ଲାଗେ ତନୁ ଲତା ।

ଶତଶତ ବାଧାବିଘ୍ନ ଚିନ୍ତା ବିଷ

ଦୁଃଖ ଦୈନ୍ଯ ବୃଚ୍ଛିକ ଦଂଶନ

ଶରବିଦ୍ଧ ପରାହତ ଦେହମନ

ସ୍ପର୍ଶେ ତୁମ ହୁଏ ଉପଶମ ।

ପଲ୍ଲବିତ ସବୁଜିମା ପକ୍ବଶାଳୀ 

ଜୀବନରେ ଉତ୍ସାହ ଆନନ୍ଦ 

ଗ୍ରୀବା ତୋଳି ନାଚୁ ମନ ମୋ ମୟୂରୀ

ତୋଳୁ କଣ୍ଠ ଶୁଭ ମଧୁ ସ୍ବନ ।

ଶୀତରାଣୀ ଢଳଢଳ ବିମ୍ବ ଓଷ୍ଠେ

ଖିଲିଖିଲି ଫୁଟୁ ହସ ରଙ୍ଗ 

ଜଣାଉଛି ହୃଦୟ ନିଭୃତ କୋଣୁ

ଶତଶତ ମୁଁ ଅଭିନନ୍ଦନ ।