ଅବାସ୍ତବ

ପଳାଶ ଫୁଲର ଗନ୍ଧରେ ବିଭୋର

ମୁହିଁ ଯେ' ପାଗଳ ଭ୍ରମର

ଦେଖେ ସ୍ଵପ୍ନ ଅବାସ୍ତବ ନିରନ୍ତର !

ଡିମିରି ଫୁଲର ପ୍ରକାଶେ ଅଧୀର

ମୁଁ ଭାବୁକ ପ୍ରବର

ଭାଳେ ସଦା କଥା ଅବାନ୍ତର !

ସବୁ କାହିଁକିର ଖୋଜଇ ଉତ୍ତର

ବାଷ୍ପୀୟ ଦ୍ରବ୍ୟର ମାପଇ ଆକାର

ଜଳ ଗଣେ ଅଫେରା ନଈର !

ଦୁନିଆ ବୁକୁରେ ଯେତେ ଯାହା

ନିହାତି ନିଶ୍ଚିତ ଅବାସ୍ତବ ଅବାନ୍ତର

ତାହାର ଚିନ୍ତନ ମନ୍ଥନ କରିବା 

ମୋ ଲାଗି ଅଟଇ ସୁଖକର !

ଧୂସର ନିରସ ପାଣ୍ଡୁର ବାସ୍ତବେ

ମୋର ନାହିଁ ତିଳେ ପ୍ରୟୋଜନ

ଅବାସ୍ତବ ସ୍ବପ୍ନର ପରିକଳ୍ପନାରେ

ମୋ ସୁଖ ସଞ୍ଚୟ ପରମ ଆନନ୍ଦ !