ଆଉ କିଛି ଅଛି

ଉଈହୁଙ୍କା ମାଟି ଖାଲି ମାଟି ନୁହେଁ ଆହୁରି ରହିଛି କିଛି,

କବିତାର ଶବ୍ଦ, ଶବ୍ଦ ନୁହେଁ ଖାଲି ଭାବ ପ୍ରେମ ଭକ୍ତି ଅଛି |

ପୁସ୍ତକରେ ଖାଲି ଶିକ୍ଷା ରହିନାହିଁ ସେଥିରେ ରହିଛି ଜ୍ଞାନ,

ନାରୀଟିଏ ଖାଲି ମଣିଷ ନୁହେଁ ସେ ଐଶ୍ଵର୍ଯ୍ୟରେ ପରିପୂର୍ଣ୍ଣ |

ଶିଶୁଟିଏ କ୍ଷୁଦ୍ର ମାନବ ନୁହେଁ ସେ ଭବିଷ୍ୟତ କର୍ଣ୍ଣଧାର,

ଭୋଗପାଇଁ ଖାଲି ଧନ ଲୋଡ଼ା ନୁହେଁ ଦାନପାଇଁ ଦରକାର |

ଗଛଟିଏ ଖାଲି ଫଳଦିଏ ନାହିଁ ଦିଏ ପୁଣି ଅମ୍ଳଜାନ,

ମଞ୍ଜିଟିଏ ଖାଲି ଗଛ ହୁଏନାହିଁ ଖାଦ୍ୟପାଇଁ ପ୍ରୟୋଜନ |

କାଠ ପଥରରେ ଖାଲି ଘର ନୁହେଁ ଗଢାହୁଏ ଦେବ-ଦେବୀ,

ସହିବା ଲୋକଟି ଦୁର୍ବଳ ନୁହଇଁ ତା' ହାତରେ ଥାଏ ଚାବି |

ଫୁଲରେ କେବଳ କୋମଳତା ନାହିଁ ରହିଛି ସେଥିରେ ବାସ,

ଦୁଃଖୀର ଆଖିରେ ଖାଲି ଲୁହନାହିଁ ଲୁଚି ରହିଥାଏ ହସ |