ଆଉ କେତେ ଦିନ
ଆଉ କେତେ ଦିନ
ଆଉ କେତେ ଦିନ ଚାଲିବିରେ ଧନ
ପାଦ ପଡ଼ିଲାଣି ଥକି
ବୋହି ବୋହି ବୋଝ ପିଠି ହେଲା କୁଜ
ଅଣ୍ଟା ପାରୁନି ସଳଖି |
ଯେଉଁ ଗାଣ୍ଡିବଟି ହାତେ ଧରୁଥିଲି
ଆଜି ମୁଣ୍ଡେଇଛି ମାଥେ
ହାତ ଧରି ଯିଏ ଚାଲି ଶିଖୁଥିଲେ
ଛାଡ଼ିଗଲେ ଦେଇ ନାତେ |
ଆଣ୍ଠୁ ଗଣ୍ଠିବାତ ଅଣଚାଶ ବାତ
ବହିଲାଣି ଅବିରତ
ଜୀବନ ପ୍ରଦୀପ ହେବ ନିର୍ବାପିତ
ଭେଟିବି ଚରମ ସତ୍ୟ |
ଯାହା ଅରଜିଲି ସବୁ ବରଜିଲି
ଆତ୍ମୀୟଙ୍କ ଉପକାରେ
ଗଧ ପରି ଖଟି ପେଟୁ କାଟିକୁଟି
ବ୍ୟସ୍ତ ପର ଉପଚାରେ |
ମୁଣ୍ଡକୁ ଯେମନ୍ତ ପାଇଗଲା ହସ୍ତ
କଲେ ଧିରେ ହତାଦର
ଯିଏ ଥିଲା ଇଷ୍ଟ ଆଜି ସେ ଅନିଷ୍ଟ
ଶରବ୍ୟ ରୁଷ୍ଟ କ୍ରୋଧର |
ଗୋଟିଏ କୂପରୁ ଦଶ ଗୋଟି କୂପ
ପାଉଥିଲେ ଜଳରାଶି
ଦଶ ଏବେ ପୂର୍ଣ୍ଣ ମୂଳ କୂପ ଶୂନ୍ୟ
ଅମାଗ୍ରାସେ ପୌର୍ଣ୍ଣମାସୀ |
ଏଇତ ସଂସାର ମାୟା ଖେଳଘର
ଇନ୍ଦ୍ରଜାଲ ପରକାର
ଏକମାତ୍ର ସତ୍ୟ ପ୍ରଭୁ ଜଗନ୍ନାଥ
ଆଶ୍ରାକର ହେବ ପାର |