ଆତ୍ମନେପଦୀ : ଧୃତରାଷ୍ଟ୍ର
ଆତ୍ମନେପଦୀ : ଧୃତରାଷ୍ଟ୍ର
ଆତ୍ମ ପ୍ରଶଂସାରେ ବିଭୋର ମୁଁ ରାଜା ଧୃତରାଷ୍ଟ୍ର,
ପୁତ୍ରମୋହ ରାଜ୍ୟମୋହ କ୍ଷମତାର ମୋହ-
ଚକ୍ଷୁହୀନ ହେଲେ ବି ମୁଁ ନାହିଁ ମୋ ଶୋଚନା |
ସଞ୍ଜୟ ମୋ ଦିବ୍ୟଦୃଷ୍ଟି କରେ ଦର୍ଶନ ଵର୍ଣ୍ଣନ,
ଭୀଷ୍ମପରି ଅଷ୍ଟବସୁ ଅଛନ୍ତି ମୋ ପାଶେ |
ଦୁର୍ଯ୍ୟୋଧନ ପରି ମାନି ମୋର ଜ୍ୟୋଷ୍ଠପୁତ୍ର,
ଶତପୁତ୍ରର ଜନନୀ ଗାନ୍ଧାରୀ ମୋ ପତ୍ନୀ |
ବଳେବଳେ ଗର୍ବ ଆଉ ଅହଂକାର ଆସେ,
ମୁଁ ଜାଣେ କୁରୁବଂଶ ସଦା ନିରାପଦ |
ମୋର ବାହୁବଳ କଥା ଜାଣିଛନ୍ତି ଇନ୍ଦ୍ର,
ବଜ୍ରକୁ ମୁଁ ଭାଙ୍ଗିପାରେ କରି ଖଣ୍ଡଖଣ୍ଡ |
ଲୌହସ୍ତମ୍ଭ ମୋ ଆଗରେ ସାମାନ୍ୟ କୁଶାଗ୍ର |
ଧର୍ମବଳ କର୍ମବଳ ଆଉ ପୁଣ୍ୟବଳ,
ସଞ୍ଚିତ ରହିଛି ପୂର୍ବପୁରୁଷଙ୍କ ସବୁ ଆଶିର୍ବାଦ |
ଶାଳକ ମୋ ରାଜପୁତ୍ର ଗାନ୍ଧାର ରାଜ୍ୟର,
ସଦା ସହାୟକ ପୁଣି ଗୁରୁ ଦ୍ରୋଣାଚାର୍ଯ୍ୟ |
ଅନୁମୋଦନ କରୁଛି ଦୁର୍ଯ୍ୟୋଧନର ପ୍ରସ୍ତାବ,
ଯୁଦ୍ଧହେଉ କୁରୁକ୍ଷେତ୍ରେ ମହାଭାରତର |
ରଣକ୍ଷେତ୍ରେ ମୃତ୍ୟୁହେଲେ ହେବ ସ୍ୱର୍ଗଲାଭ,
ଶତ୍ରୁକୁ ନିପାତ କଲେ ହେବ ନିଷ୍କଣ୍ଟକ ରାଜ୍ୟଲାଭ |
ଏ'କଥା ତ ଚକ୍ରଧାରୀ ଶ୍ରୀକୃଷ୍ଣଙ୍କ ଭାଷା,
ଶକ୍ତିଶାଳୀ ପ୍ରତିପକ୍ଷକୁ ହରାଇବା ମୋର ଏକମାତ୍ର ଲକ୍ଷ୍ୟ |