ଆସିଲା ଶରତ

ଆସିଲା ଶରତ  ହସିଲା ମରତ

  ହରିତ ଧରଣୀ ଦିଶିଲା

ସଲୀଳ ଆବିଳ  ଧିରେ ଅନାବିଳ

   ସରେ ସରସିଜ ହସିଲା ।

ସୁନୀଳ ଅମ୍ବରେ ବର୍ଣ୍ଣିଳ ବିଭାରେ

   ଧଳା ମେଘଖଣ୍ଡ ଭାସିଲା

କେଦାରେ କେଦାରେ ସବୁଜ ଆଭାରେ

   ଧାନ ଆଖୁ ଶସ୍ୟ ଲସିଲା ।

ଶୁଭ୍ର ଶରତର  ଶୁଭ୍ର ସହଚର

   ହଂସ ଆଗମନ ହୋଇଲା

ନୀଳମ୍ବୁ ଚିଲିକା  ବିଶାଳ ଦୀର୍ଘ଼ୀକା

   ବିହଗ ବିହାର ସାଜିଲା ।

ଶଇଳେ ଶଇଳେ  ନିର୍ଝର ଝର୍ଝରେ

   କୁଳୁ କୁଳୁ ତାନେ ବହିଲା 

ସବୁଜ ବଳୟ   ହେଲା ଅଭ୍ୟୁଦୟ

    ଦର୍ଶକ ମାନସ ମୋହିଲା ।

କାଦମ୍ବିନୀ କୋଳେ ସୌଦାମିନୀ ଖେଳେ

   ଶୁଖିଲା ଦମ୍ଭୋଳି ଗର୍ଜିଲା

ଚନ୍ଦ୍ରିକା ଚର୍ଚ୍ଚିତା  ଯାମିନୀ ଭୂଷିତା 

    ରଜତେ ଧରାକୁ ମାଜିଲା ।

ଶରତ ସୁନ୍ଦରୀ ନଦୀ ପଠାଦରି

  କାଶତଣ୍ଡୀ ଫୁଲେ ହସିଲା

କୋମଳ ବାଲୁକା ସ୍ୱର୍ଣ୍ଣିମ ଅଳକା

  ସୁଷମାରେ ମନ ରସିଲା ।

କାଳିକା ମାଳିକା ଆଳେ ବକାଳିକା

  ଚିରାଳ ସୁନ୍ଦର ଦିଶିଲା

ନବୋଦିତ ରବି ସ୍ୱର୍ଣ୍ଣମୟ ଛବି

  ବନସ୍ପତି ଶୀର୍ଷ ସ୍ପର୍ଶିଲା ।

ଦେବୀ ପରବରେ ପୁଣ୍ୟ ପାର୍ବଣରେ

  ମୁଖେ ମୁଖେ ହସ ଫୁଟିଲା 

ମହିଷ ମର୍ଦ୍ଦିନୀ କେଶରୀ ବାହିନୀ

  ଆଗମନେ ଦୁଃଖ ହଟିଲା ।

ପଲ୍ଲୀଠାରୁ ଦିଲ୍ଲୀ ଉଠିଲା ଚହଲି

  ଧରା ଫୁଲି ଫୁଲି ହସିଲା

ମେଢ଼ ମଣ୍ଡପରେ ଆତସବାଜିରେ

  ଧୂପ ଝୁଣା ଗନ୍ଧ ବାସିଲା ।

କୁମାର ପୂର୍ଣ୍ଣିମା  ପରବ ଚନ୍ଦ୍ରମା

   ଚାନ୍ଦିନୀ ଜଗତ ମୋହିଲା

କୁଆଁରୀଏ ମେଳ ନାଚଗୀତ ଖେଳ

   ଯୁବା ଦମ୍ଭ କଲା ଘାଇଲା ।

ନିଆଳି ସେବତୀ ଚମ୍ପକ ମାଳତୀ

   ଅଗସ୍ତି କୁସୁମ ଫୁଟିଲା 

ବନେ ଉପବନେ ବିକଚ ସୁମନେ 

  ଅଳି ଗୁଞ୍ଜରଣ ଛୁଟିଲା ।

ଆଶ୍ଵିନ ଭାଦ୍ରବେ ଶାରଦୀୟ ପର୍ବେ 

   ଗଣନାଥ ପୂଜା ପଡ଼ିଲା 

ପୂଜା ଅବସରେ ପ୍ରତି ଘରେ ଘରେ 

   ଆନନ୍ଦ ଲହରୀ ଖେଳିଲା ।