ଆସିଛି ଶରତ ହସୁଛି ଜଗତ

ଆସିଛି ଶରତ ହସୁଛି ଜଗତ

ପ୍ରକୃତିରାଣୀ ସଜାଇଛି ତାର ଗଭା

ଶୁଭ୍ର ସ୍ନିଗ୍ଧ କମନୀୟ ରୂପ ଲାବଣ୍ୟର

ବଢ଼ାଏ ଶୋଭା କାଶତଣ୍ଡିର ଆଭା

ଫୁଟେ କେରା କେରା ଲାଗେ ନିଆରା 

ନଈପଠାର ବାଲୁକାରାଶି ଧାରେ ଧାରେ

ବହିଯାଏ ସ୍ଵଚ୍ଛ ନିର୍ମଳ ଜଳଧାରା 

ବିଲ ଆଡ଼ିଠାରୁ ଅପନ୍ତରା ପ୍ରାନ୍ତରରେ

କାଶତଣ୍ଡୀ ଫୁଲ ଉଡ଼ାଏ ସଫେଦ ଓଢ଼ଣୀ

ବାଡ଼ୁଅ ବୟସର ଚହଲା ମନକୁ

ଆଖିର ମିଟିକାରେ ତାର ନିଅଇ ଟାଣି

ଭରି ଦିଏ ଅପୂର୍ବ ସୁଷମା ଲାଗେ ଅନୁପମା

ଉଛୁଳା ପ୍ରେମ ପରି ଲଙ୍ଘି ଯାଏ ସୀମା

ଘାସ ଫୁଲଟିଏ ହୋଇ କାଶତଣ୍ଡୀ

ପରିବେଶକୁ ସୁନ୍ଦର କରି ଦିଏ ସଜାଡ଼ି

ଦୁଗ୍ଧ ଫେନିଳ ସବୁଜ ମିଶା ଦିଶେ କ୍ଷେତ

ଆସିଛି ଶରତ ହସୁଛି ଜଗତ 

ରଙ୍ଗ ବୋଳା ଅଙ୍ଗ ଢ଼ଙ୍ଗର ବିନ୍ୟାସେ

ତା' ମନଲୋଭା ରୂପକାନ୍ତି ଝଲସେ 

ପହିଲି ଶରତ ପାର୍ବଣକୁ ଠାରି ଡ଼ାକେ 

ଗହଳ ଚହଳ ପଡ଼େ ସାରା ମୂଲକେ

ଅବତରୀ ଆସିବେ ମା' ଦୁର୍ଗତିନାଶିନୀ

ଆଶିଷ ଦେବେ ଢ଼ାଳି ସେ ଜଗତ ଜନନୀ 

ଭକ୍ତି ଭାବ ରଖି କରିବେ ଜନ ଆରାଧନା

ତୋଷିବେ ମା' ମନ କରି ପୂଜା ଅର୍ଚ୍ଚନା 

ସୁଖ ଶାନ୍ତିରେ କଟିବ ଜୀବନ

ଆକାଶରୁ ମେଘମାଳା ଯାଏ ଅପସରି

ରଜନୀରେ ଜହ୍ନର ଜୋଛନା ପଡ଼େ ଝରି

ଅବନୀ ଆନନ୍ଦେ ହୁଏ ଉଲ୍ଲସିତ 

ଚଷା ତା' ଚାଷ କ୍ଷେତ ଦେଖି ଗାଏ ଗୀତ

ଶ୍ରମର ସାଧନେ ରହିଥାଏ ଅବିରତ 

ଆଶା ତାର ସଫଳ ହେବ ନିଶ୍ଚିତ

ଆସିଛି ଶରତ ହସୁଛି ଜଗତ।