ଆସିଛି ରାକ୍ଷୀ ପୂର୍ଣ୍ଣମୀ
ଆସିଛି ରାକ୍ଷୀ ପୂର୍ଣ୍ଣମୀ
ବରଷକେ ଥରେ ହସ ଖୁସି ଦିନ
ଆସିଛି ରାକ୍ଷୀ ପୂର୍ଣ୍ଣମୀ
ଝଟକି ଦିଶିବ ଭାଇ ହାତେ ରାକ୍ଷୀ
ପିନ୍ଧାଇ ଦେବ ଭଉଣୀ ।
ଯତନେ ଲଗାଇ ଚନ୍ଦନ କୁଙ୍କୁମ
ମଥାରେ ବିଜୟ ଟୀକା
ଦୂବ ବୁରପତ୍ର ପକାଇ ଅକ୍ଷତ
ଖୁଆଇ ଦେବ ସେ ମିଠା ।
ମନାସି ସୁମନେ ଭାଇ ସୁଖଶାନ୍ତି
ଐଶ୍ଵର୍ଯ୍ୟ ଓ ବଇଭବ
ଭବିଷ୍ଯ ସୁନ୍ଦର ହେଉ ମଧୁମୟ
ଶୁଭ ଇଚ୍ଛା ଜଣାଇବ ।
ଭାଇ ଓ ଭଉଣୀ ଗୋଟିଏ ମୁଦ୍ରାର
ଆଲୋକିତ ଦୁଇ ପାର୍ଶ୍ବ
ସହଭାଗିତାରେ ଅନୁଭବି ଥାନ୍ତି
ପରିବାର ଦୁଃଖ ସୁଖ ।
ଅଭିନ୍ନ ତାଙ୍କର ରକ୍ତ ସୁସମ୍ପର୍କ
ସମଭାବ ଅନୁଚିନ୍ତା
କଷ୍ଟ ଲାଗିଥାଏ ଜଣେ କା ପାଦରେ
ଫୁଟିଯାଏ ଯଦି କଣ୍ଟା ।
ସଦା ସଚେତନ ରହିଥାଏ ଭାଇ
ଭଉଣୀର ଛାଇ ହୋଇ
ଭଉଣୀ ପଡିଲେ ଆପଦ ବିପଦେ
ଭାଇ ତା ସାହା ହୁଅଇ ।
ଭଉଣୀର ମାନ ମର୍ଯ୍ୟାଦା ସୁରକ୍ଷା
ଭାଇ ପରମ କର୍ତ୍ତବ୍ଯ
ଆମ ସୁସଂସ୍କାର ମହତ୍ତ୍ବ ସମ୍ପନ୍ନ
ସଂସାରେ ଅତୁଲ୍ଯ ଦିବ୍ଯ ।