ସ୍ୱାଗତ କରୁଛୁ ହେ ନବବର୍ଷ

ପୁରୁଣା ବରଷ ହୋଇଗଲା ଶେଷ

ତୁମେ ଆସ ମୁହେଁ ଫୁଟାଇ ହସ 

ଶୀତ ସବାରୀରେ ତୁମ ରୋଷଣିକୁ

ସ୍ୱାଗତ କରୁଛୁ ହେ ନବବର୍ଷ ।

ତୁମ ଆଗମନେ ସକଳ ପ୍ରାଣରେ

ନବ ସମ୍ଭାବନା ହେଉ ଉଦୟ

ରାଗ-ରୋଷ ଭୁଲି ରହୁ ଶାନ୍ତି ମୈତ୍ରୀ 

ପ୍ରୀତି ସଦ୍ଭାବନା ମନ୍ତ୍ରରେ ଲୟ ।

ହିଂସା କପଟତା ଗର୍ବ ଅହମିକା

ହେଉ ଦଗ୍ଧୀଭୂତ ମନୁ ସକଳ

ଭାଇଚାରା ବୁଣି ସମ୍ପର୍କ କ୍ଷେତରେ

ଗୋଟାଇ ଚାଲନ୍ତୁ ଯେତେ ସୁଫଳ ।

ନିପୁଣ ହୁଅନ୍ତୁ କର୍ମ ସାଧନରେ

ନିଜ ଉଦ୍ୟମ ପ୍ରଚେଷ୍ଟା ବଳରେ

ମାଥେ ଝରିପଡୁ ତୁମ ଶୁଭାଶିଷ

ଉପନୀତ ପ୍ରଗତିର ଶୀର୍ଷରେ ।

ସୁଖସମୃଦ୍ଧିକୁ ତୋଳି ଧରିଥାନ୍ତୁ

ସତ୍ୟ ଧର୍ମ ନ୍ୟାୟ ତ୍ୟାଗରେ ଚାଲି

ଆପଣାପଣର ମହମହ ବାସ

ବିତରୁଥାଆନ୍ତୁ ହୃଦୟ ଖୋଲି ।

ବିଜୟକେତନ ଉଡ଼ି ତୁମ ନାମେ

ତୁଣ୍ଡବାଇଦରେ ଧ୍ୱନିତ ଜୟ 

ଆନନ୍ଦୋଲ୍ଲାସରେ ବିଭୋରିତ ପ୍ରାଣ

ଛୁଟାଇ ଚାଲୁ ପ୍ରଶଂସାର ସୁଅ ।