ଆଶଙ୍କାରେ ବାହୁଡିଲି

କେତେ ସମ୍ଭାବନା ଧରି ଆସିଥିଲି

   ଆଶଙ୍କାରେ ବାହୁଡିଲି,

କାନ୍ଦି କାନ୍ଦି ଏହି ଧରା ଛୁଇଁଥିଲି

   କନ୍ଦେଇ ଯିବି ମୁଁ ଚାଲି,

   କାହିଁ କିଛି ନ ଆଣିଲି

ମୋର ମୋର କହି ଗୋଟେଇ ଗାଟେଇ

    ଅଣ୍ଟି ଖାଲି ଭରୁଥିଲି ।।

ଆଶଙ୍କାରେ ବାହୁଡିଲି...

କହି ଆସିଥିଲି କଥା ଦେଇଥିଲି

   କରିବି ଯେତେ ସୁକର୍ମ,

ମାୟାଧର ଜାଲେ ମାୟା ବନ୍ଧନରେ

   ଭୁଲିଗଲି ମୋର ଧର୍ମ,

   ତରିବି ବୋଲି ଏ ଜନ୍ମ

ଆସିବା ବାଟରେ ମନେ ଥିଲା ମୋର

    ପହଞ୍ଚି ମୁଁ ପାଶୋରିଲି ।।

ଆଶଙ୍କାରେ ବାହୁଡିଲି...

    

ତୁ ଅଛୁ ବୋଲି ତୁ ବସିଛୁ ବୋଲି

    ଦେଖୁଥାଏ ଜାଣୁଥାଏ,

ତୁ ଦେଉ ବୋଲି ତୋ ପାଖରେ ଭିଡ଼

   ଏ କଥା ବି ବୁଝୁଥାଏ,

    ସୃଷ୍ଟିକର୍ତ୍ତା ଜଗତର

ସବୁ ଜାଣି କିଆଁ ହରେକୃଷ୍ଣ ନାମ

   ତୁଣ୍ଡେ କେବେ ନ ଧରିଲି ।।

   ଆଶଙ୍କାରେ ବାହୁଡିଲି...

ଏ ଯିବା ପଥରେ ମୁଁ ଏକା ପଥିକ

   ତୁ ଏକା ଆଶରା ମୋର,

ଲୋଡାନାହିଁ ଧନଜନ ବୈଭବ

   ଉପାୟ କିଛି ତ କର,

   ତୋ ନାମକୁ ନିରନ୍ତର

ଯାଉ ଯାଉ ପ୍ରାଣ ଜାବୁଡ଼ି ଧରିବି

    ରାମ ରାମ ରାମ ବୋଲି ।।

   ଆଶଙ୍କାରେ ବାହୁଡିଲି...

କେତେ ସମ୍ଭାବନା ଧରି ଆସିଥିଲି

   ଆଶଙ୍କାରେ ବାହୁଡିଲି ।।