ଆସ ଦୀପଟିଏ ଜାଳିବା
ଆସ ଦୀପଟିଏ ଜାଳିବା
ଆସ,
ଜାଳିବା ଦୀପଟିଏ
ଏଇ ଆଶାରେ,
ଦୃଶ୍ୟମାନ ହେଉ
କରୋନାର ଅଦୃଶ୍ୟ କାୟା
ଜଳିଯାଉ ତାର ସମଗ୍ର ଅସ୍ତିତ୍ଵ
ବଶୀଭୂତ ହେଉ ତାର କୂଟମାୟା ।
ଆସ,
ଜାଳିବା ଦୀପଟିଏ
ଏଇ ଭରଷାରେ,
ଲେଳିହାନ୍ ଶିଖା ଅଭିଷିକ୍ତ କରୁ ମଣିଷକୁ
ପିନ୍ଧେଇ ଦେଉ କବଜ ସୁରକ୍ଷାର ,
ଜ୍ୟୋତିରେ ତା ଭସ୍ମୀଭୂତ ହେଉ
ଜୀବାଶ୍ମ ଅଜଣା ଭୁତାଣୁର ।
ଆସ,
ଦୀପଟିଏ ଜାଳିବା
ଏହି ଅଙ୍ଗୀକାରରେ,
ଶାପମୁକ୍ତ ହେଉ ଧରା
ଅନ୍ଧାରୀ ମୂଳକରେ ଆସୁ ଆଲୋକ ,
ନୂଆ ଆଶାର,
ନୂଆ ସମ୍ଭାବନାର
ନୂଆ ଯୁଗର ।