ଆନ୍ତର୍ଜାତୀୟ ଗଣତନ୍ତ୍ର ଦିବସର ଚିନ୍ତନ

ସେପ୍ଟେମ୍ବର ମାସ      ପନ୍ଦର ତାରିଖ

        ଗୁରତ୍ବପୂର୍ଣ୍ଣ ଦିବସ

ସାରା ବିଶ୍ବ ଆଜି      ପାଳନ କରୁଛି

       ଗଣତନ୍ତ୍ରର  ଦିବସ |

ଆନ୍ତର୍ଜାତୀୟ       ଗଣତନ୍ତ୍ରଦିବସେ

       ଚିନ୍ତନ ମହନୀୟ

ଗଣଙ୍କର ପାଇଁ      ଗଣଙ୍କ ଶାସନ

     ଗଣଦ୍ବାରା କମନୀୟ |

 

ଲୋକଙ୍କର ମତ       ସର୍ବସମ୍ମତ

        ସର୍ବଦା ରଖେ ଗୁରୁତ୍ବ

 ଗଣଙ୍କ କଲ୍ୟାଣ       ଗଣଙ୍କର ଦ୍ବାରା

       ହୁଏ ସଦା ସଂପାଦିତ|

ନିର୍ବାଚନ ଦ୍ବାରା      ପ୍ରତିନିଧି ବାଛି

      ସଂସଦ ଗଠନ କରି

ନିଜର ହାତରେ      ନିଜର ଶାସନ

      ସଂସଦର ଭାଗ୍ୟଡୋରୀ |

ନିଜର ନାବରେ      ନିଜେ ହିଁ ନାଉରୀ

     ସ୍ବହସ୍ତେ ଶାସନ ଡୋରୀ

ସଂଖ୍ୟାରେ ଗରିଷ୍ଠ     ମତରେ ଚାଲଇ

     ଶାସନ କଲ୍ୟାଣ କାରୀ |

ଲୋକଙ୍କର ଆଶା     ବିଶ୍ବାସ ଓ ଭୟ

      ଉଦବେଗର ଫାଇଦା

ନେଇ ବେଳେ ବେଳେ   କୁଚକ୍ରୀ କରଇ

       ଧନ ଜୀବନ ସଉଦା |

 ବସାଇବ ନାହିଁ     ସେପରି ଲୋକଙ୍କୁ

  କେବେ ବି  ଭଉଣୀ ଭାଇ

 ଶାସନର ଗାଦି     ପାଇଗଲା ପରେ

    ବୁହାନ୍ତି ଦୁଃଖର ନଈ |

ଗଣତନ୍ତ୍ରରେ ତ     ଅସନ୍ତୁଷ୍ଟ ହେବା

     ଅଟେ ଆମ ଅଧିକାର

ଲୋଡାହେଲେ ଆମେ   ଉଠାଇ ପାରିବା

       ଆମ ପ୍ରତିବାଦ ସ୍ବର |

 ଡରିବାର ନାହିଁ       ଗଣତନ୍ତ୍ର ଅଟେ

        ଗଣଙ୍କର ସୁଶାସନ

ଅନ୍ୟାୟ ଅନୀତି       ଦୁର୍ନୀତି ଲୁଣ୍ଠନ

      ନାହିଁ ଭ୍ରଷ୍ଟାଚାର ସ୍ଥାନ |

ଭାଙ୍ଗିବା ଗଢିବା     ସବୁ ଆମ ହାତେ

       ଗଣତନ୍ତ୍ରର ଶାସନେ

ନିଜଭାଗ୍ୟ ଡୋରୀ    ନିଜ ହସ୍ତେ ବୋଲି

      ସଦା ରଖିଥିବ ମନେ |

ମଦ ମାଂସ ଲୋଭ      ଅର୍ଥର ଲାଳସା

      ଯେତେ ସବୁ ପ୍ରଲୋଭନ

ବଙ୍ଗୋପ ସାଗରେ       ବିସର୍ଜନ କରି

       କର ତୁମେ ନିର୍ବାଚନ |

 ଭଲ ଲୋକ ଯେବେ    ନିର୍ବାଚିତ ହେବ

         କରିବ ସେ ସୁଶାସନ

 ଗରିବୀ ବେକାରୀ       ହଟିବ ଧରାରୁ

         ବଢିବ ଜୀଇଁବାର ମାନ|

ଜାତି ଧର୍ମ ମଧ୍ୟେ      ଭେଦା ଭେଦ ଭାବ

       ନାହିଁ ଗଣତନ୍ତ୍ରେ ସ୍ଥାନ

ଏକମାତ୍ର ଜାତି       ମଣିଷ ଜାତି ହେ

     ମାନବତା  ଏକ ଧର୍ମ |

ହିଂସା କଷଣ       ଅତ୍ୟାଚାର ନାହିଁ

     ଗଣତନ୍ତ୍ର ଅଭିଧାନେ

ଶୋଷଣ ଲୁଣ୍ଠନ     ନାରୀର ଧର୍ଷଣ

      ଚଳେନି ରଖିବ ମନେ|

ଅଛି ବଞ୍ଚିବାର         ଅଧିକାର ତୁମ

    ନେଇ ପାରିବନି କେହି

 ହୋଇଲେ ବଞ୍ଚିତ       କର ପ୍ରତିବାଦ

     ଅହିଂସା ପଥରେ ରହି |

ଜାଗ ଖଟିଖିଆ        ଦିନ ମଜୁରିଆା

      ଜାଗ ହେ ଦୁର୍ବଳ ଆଜି

ଉଠହେ କଙ୍କାଳ      ଛିଡାଇ ଶୃଙ୍ଖଳ

    ଗଣତନ୍ତ୍ର କହେ ଆଜି|

କରେ ନିବେଦନ     ଆହେ ବିଶ୍ବଜନ

    ଜାଗ୍ରତ ହୁଅ ହେ ଆଜି

ଗଣତନ୍ତ୍ର ଭିତ୍ତି       ସୁଦୃଢ କର ହେ

   ଜାଗ୍ରତ ପ୍ରହରୀ ସାଜି |

ଅନ୍ୟାୟ ଦେଖିଲେ    ଚୂପ ବସ ନାହିଁ

      କର ପ୍ରତିବାଦ ତାର

ଗଣତନ୍ତ୍ର ଅଟେ     ଶୋଷଣ ବିହୀନ

    ନ୍ୟାୟ ଶାସନ ସମାଜର |

ଗଣତନ୍ତ୍ରେ ନାହିଁ     ସ୍ବୈର ଶାସନ କି

      ଫାଶୀବାଦର  ସ୍ଥାନ 

ସବୁରି ମଙ୍ଗଳ      ସବୁରି ବିକାଶ

    ଗଣତନ୍ତ୍ର ମନ୍ତ୍ର ଜାଣ |

ଅକ୍ଷୟ ରହୁ ହେ     ଗଣତନ୍ତ୍ର ବିଶ୍ବେ

    ଖୋଲୁ ବିଶ୍ବ ବାତାୟନ

ଶାନ୍ତି ମଇତିରି    ବିଶ୍ବ ଭ୍ରାତୃତ୍ବର

    ବସୁଧୈବ କୁଟୁମ୍ବକମ୍ |