ଆମନ୍ତ୍ରଣ
ଆମନ୍ତ୍ରଣ
ଓଦା ମାଟିର ବାସ୍ନାରେ
ପୁଲକିତ ହେଉଥିଲା
ମୋର ସାରା ତନୁ ଆଉ ମନ।
ଅନ୍ତରର ପ୍ରତି କୋଣ ଅନୁକୋଣ
ଅନୁଭବ କରୁଥିଲା
ଭିନ୍ନ ଏକ ମାଦକତା ଆଉ ଶିହରଣ।
ନିରାଜନା କରିବାକୁ
ମାଟି ମାଆର ସେ କାନ୍ତ,
କମନୀୟ ଆଭା,
ବ୍ୟାକୁଳିତ ଥିଲା ମୋ ପରାଣ।
ଚୁନା ଫୁଲର ହସରେ
ସଜା ହୋଇରହିଥିବା
ସବୁଜ ଘାସ ଗାଲିଚା,
ତା କୋଳରେ ଶୋଇରହି
ଆଞ୍ଜୁଳା ଆଞ୍ଜୁଳା କରି
ପିଇବାକୁ ଭିଜା ମାଟି ବାସ୍ନା,
କରୁଥିଲା ମୋତେ
ସ୍ନେହବୋଳା ଆମନ୍ତ୍ରଣ।
ହିମ ମୃଦୁ ହିଲ୍ଲୋଳରେ
ଝୁଲି ଝୁଲି ଖେଳୁଥିବା
କଦମ୍ବ ଫୁଲଟା
ମନ ବାତାୟନ ଫାଙ୍କେ
ହାତଠାରି ଡାକୁଥିଲା
ମୋତେ ତା' ପାଖକୁ।
ଜୀବନ ଯମୁନା କୂଳେ
କେଳି କଦମ୍ବର ମୂଳେ
ନିରବରେ ବସିରହି,
ନିଜ ହୃଦୟ କନ୍ଦରୁ
ଭାସି ଭାସି ଆସୁଥିବା
ବଇଁଶୀର ସୁମଧୁର ସ୍ଵନ ଶୁଣିବାକୁ।