Library
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା
ଆମର ମୁଡେ ଗାନ୍ଧୀ ଟୋପି
ଆମେ ପିନ୍ଦସୁ ଧୁଟି,
ପାଦେ ଫଟା ଚପଲ ଆଉ
ଧର୍ସୁ ଆମେ ଛତା ।
ଆମେ ହଉଛୁଁ ଦେଶର୍ କର୍ତ୍ତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା ।
ଭୋଟ୍ ପାଏ ଲେ ବଂଶୁ ଆମେ
ଭୋଟର ମାନକର ରଜା
ଫୁଲମାଳ ଦେଇ ଗାଆଁ ଗାଆଁ ବୁଲାସନ୍
ବଜେଇକରି ଗଂଡା ବାଜା ।
ଏମ୍ଏଲ୍ଏ କ୍ୱାଟରେ ରହେସୁ ଆମେ
ପାଏସୁଁ ଭତ୍ତା ଆଉ ଗାଡ଼ି
ଖାଇ ପିଇ କରି ମଜା କରସୁନ
ଭୋଟରଠାନୁ ମୁହଁ ମୁଡ଼ି।
ଆଇଲା ପାଂଚ ବରଷତକ୍
ଆମେ କର୍ମୁ କେତେ ଚାଲ୍
ଅଫିସର୍ ଠିକାଦାର ନୁ ପିସି ଆସବା
ଆମେ ହେବୁ କେତେ ମାଲେମାଲ ।
ଆମେ ପରେ ଦେଶର ନିର୍ମାତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା।।
ଭୋଟ ଆଏଲେ ବଡସି ଆମର ବୁତା
ସବ କର୍ ପାସ୍ କେ ଜିବାର୍କେ ପଡଶି
କେତେ ଆମର ସାଂଗ ସର୍ତା ।
କେତେ ମଦ କୁକୁଡ଼ା ଆଉ
ଟଂକା ପୈସାର ଖେଲ
କେତେ ମିଟିଂ କେତେ ଛିଟିଂ
ହେବା ଇନ ବେଲ୍ବେଲ୍ ।
ଭୋଟର ବେଲେ ଆମେ
ନାଇଁ ମାନୁ ବାଡବତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା ।
ହାତୀ ଦେମି ଘୁଡା ଦେମି
କହେସୁ ଆମର କାମ
କଥା ଦେଇକରି ଭୁଲି ଜାଏସୁଁ
ହେଉ ପଛେ ବଦନାମ ।
ଭୋଟ ଲାଗି ଆମେ ଯାଏସୁଁ
ଘର୍ ଘର୍ ପଡ଼ା ପଡ଼ା
ଭିତରେ ଭିତରେ ବାଟସୁଁ
ନୋଟ କେତ୍ନି କେତ୍ନୀ ବିଡା ।
ଭୋଟ ପାଇ ଗଲେ
ଆମେ ହେସୁ ଜଗତଜିତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା ।
ଇନ୍ଦିରା ଆବାସ, ବୁଢ଼ା ବୁଢୀ
ଭତ୍ତା କରେଇ ନେମି
ଭୋଟ ସଲେ ତୋର ଗାଁ କେ
ରୋଡ଼ ରାସ୍ତା କରେଇ ଦେମି ।
ଗାଁର ସବୁ ବନ୍ଧ , ନାଲା
ବନେଇ ଦେମି କେତେ
କର୍ଵ ତମେ ଠିକା କାମ
ଯାହାକେ ଜେତ୍କି ଯେତେ ।
ଭୋଟ ପାଏଲେ ମନ୍ତ୍ରୀ ହେଲେ
ମୁଇଁ କାଟ୍ମି କେତେ ଫିତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା।।
ଅହିଂସା ର ପୂଜାରୀ ଆମେ
ଗାନ୍ଧୀ ବୁଢ଼ାର ଚେଲା
ବାହାରେ ବାହାରେ ମାଡ଼ ଲଗାସୁଁ
ଭିତରେ କରସୁଁ ପାଲା
ଲୁକର ଭିତରେ ନାଇଁ ଖାଉଁ ଆମେ
ମଦ, ମାଂସ, ଆଉ କୁକୁରା
ଭୋଟର ଦିନେ ମିଶି ଖାଏ ସୁଁ
ଜାଉଥିସୁଁ ପରାପରା ।
ଆମେ ଦେଇ ଦେଇ ଦାତା
ଆମେ ହେଲୁ ପରେ ନେତା
ଆମେ ହେଲୁ ପରେ ନେତା।।
କେଶବ ଚନ୍ଦ୍ର ଦାଶ, ଚିପିଲିମା
ସମ୍ବଲପୁର।
